Atualità
Spending review sforza a smendrì liec ti spediei
USP – La reduzion de liec ti spediei ududa dant dal Guviern Monti muessa nce unì fata tla provinzia de Bulsan. La Jonta provinziela à (NCUEI) ai 27 de dezëmber dat pro te ciun spediei che l muessa unì smendrì de ndut 216 liec.
Per sparanië custimënt publich, la spending review, à l Stat talian metù dant che la Provinzia de Bulsan muessa tl 2013 y 2014 smëndrì de ndut 50 milion de euro pra l custimënt dla sanità. Tla repartizions stazioneres di set spediei dl Südtirol muessel de ndut unì smëndrì 216 de ndut 1783 liec. "Y tlo ne pudons nia fé autramënter ajache chësc nes vën metù dant da Roma" à dit l presidënt Durnwalder.
La Jonta provinziela à udù dant che l muessa unì smendrì 30 liec tl spedel de Bulsan, 67 tl spedel de Maran, 74 tl spedel de Persenon y 45 tl spedel de Burnech. Te una dla proscima sentedes muessela mo unì dat pro ulà smëndrì 61 liec dla repartizions de reabilitazion.
N cont de sparani finanziel messerà l spedel de Bulsan sparanië 11,9 milion de euro, chël de Maran 6,1 milion de euro, chël de Persenon y Burnech, 3,5 milion per un.
"La dezijion ie unida tëuta sun la basa de zifres de ani defrënc, l pudëssa perchël mo unì fat de pitla mudazions" à dit l presidënt Luis Durnwalder te cunferënza stampa riesc do la senteda dla Jonta. Per la dezijion ulà che uni spedel tol demez i singuli liec, aspieten mo na pruposta dala unità sanitera.
L plann generel de sparani ti spedei muessa unì mandà a Roma nchin ala fin de merz.
as
Galaria dales fotografies
Landeshauptmann Durnwalder erläutert die Sparmaßnahmen im Gesundheitswesen
- Scarica il file audio 519 kb
