Atualità
Banda leria: coliamënć ADSL por le 89,2% di südtirolesc
USP - Portè la banda leria te dötes les ćiases dl Südtirol: chësc é le fin dla Junta provinziala, che à sotescrit ti ultimi mëisc n’acordanza cun Telecom Italia. L'acordanza vëiga danfora che le 99,2% dla popolaziun dl Südtirol ti röies pormez dl 2014 a n coliamënt ADSL tres les zentrales Telecom. Al momënt él le 89,2% di zitadins che po s’anuzé dl sorvisc.
L’internet aslöm por amplié la competitivité dl Südtirol: sides por les impreses, che por les families. Chësc é un di obietifs prioritars sön l'ajënda politica dla Junta provinziala, che se dà da fà de de plü versc. La Provinzia investësc tröp por realisé les condütes y mëte i cabli, por che ara vais da colié düć i comuns dl Südtirol ala rëi de fira otica, deperpo che les aministraziuns de comun se crüzia di coliamënć sön so raiun.
"Por conzede l'azès ala banda leria a families y impreses - sotrissëia l'assessur por i laûrs publics Florian Mussner – él gnü sotescrit ti ultimi mëisc n’acordanza cun Telecom Italia: la Provinzia se tol dant da ti conzede al'aziënda l'adoranza dles 37 trates da cabli cun fira otica sides tres les trasses prinzipales dl raiun, che tles valades laterales. Telecom Italia investësc porchël 3,6 miliuns de euro por l'adatamënt de sües zentrales ai bojëgns tecnics plü moderns por ći che reverda l’internet aslöm".
Por mirit de chisc intervënć sarà i coliamënć ADSL desponibli tres les linies dl telefonn atuales por düć chi che é te n raiun de zirca 4 km. dales zentrales Telecom. L'acordanza vëiga danfora l'oferta ai tliënć de coliamënć a na velozité dër alta (7 megabyte al secunt), cun la poscibilité da arjunje por la fin dl 2014 feter 120mile südtirolesc che ne n’à al momënt nia n te’ sorvisc. A chësta moda gnaràl anulè le digital divide che penalisëia n valgügn raiuns dl teritore provinzial.
Tl Südtirol él 155 zentrales de Telecom Italia che po pité le sorvisc ADSL. La Provinzia ti le mët a desposiziun, tratan che ara stlüj jö i laûrs sön la rëi telematica locala, al operadù dl telefonn, che à spo sis mëisc por ti pité ai tliënć la poscibilité de coliamënć web a na gran velozité. "I intervënć sön les zentrales respetëia i tëmps stabilis - dij Mussner – por la fin de jenà saràl danman le 20% dles infrastrotöres che ti darà al 90% dla popolaziun dl Südtirol la poscibilité da adorè le sorvisc ADSL". Ti proscimi dis, por ejëmpl, gnaràl ativé döes zentrales a Porsenù, öna a Kurzras, Mantena Todëscia, Fie y Anterselva.
usp
