Atualità
L Südtirol-Pass vëgn prolungé automaticamënter
USP - Ai 14 de forà complësc le Südtirol-Pass n ann. I presciapüch 120.000 anuzadus dl abonamënt ne n’à nia bria da se cruzié: so Südtirol-Pass vëgn prolungé automaticamënter de n ann, al basta ma l’adorè inant.
Manco burocrazia co insciö ne va nia. Inće do che al é tomè le pröm ann ne n’à degügn anuzadus dl Südtirol-Pass bria da se cruzié co ch’an fej da le prolungé deache chësc vëgn a s’al dè automaticamënter sc’al vëgn adorè inant. “Ma chës chertes che n’é por dui agn alalungia nia güdes adorades gnarà dejativades d’ofize canch’al toma le secundo ann de validité“ spliga l’assessur Thomas Widmann. Al dëida inće recordè che do da n ann vëgnel inće azerè le cunt di chilometri. Porchël metarà dötes les porsones che s’anüza dl abonamënt indô man dal pröm livel dla tarifa, chël ô dì che an paiarà 8 cent al chilometer sc’an à la tarifa normala y 6 cent al chilometer cun la tarifa familia. “Chi che â bele dl 2011 n abonamënt por le trasport publich ciafa inće en chësc ann indô, sciöche impormetü, n bonus de 500 chilometri a na manira da rové spo plü aslöm pro la tarifa manco ćera”, dij Widmann, che é responsabl tla Junta provinziala por la mobilité publica.
Chi che adora tröp i mesi publics sa che cun le sistem tarifar nü costa i pröms 1000 chilometri 8 o 6 cent al chilometer al ann, canch’al vëgn arjunt le secundo livel tarifar (che va ćina 10.000 km) spo pàion 4 cent (cun la tarifa familia 3 cent), y pro le terzo livel tarifar (dai 10.000 km ai 20.000 km) vëgnel preodü n cost de 2 cent por vigni chilometer. Sc’an arjunj i 20.000 km spo pon jì debann por le rest dl ann.
Zënza burocrazia vëgnel inće a s’al dè le mudamënt por chi che à n Südtirol-Pass cun la tarifa familia cun mituns che à arjunt la majera eté tratan chësc ann passè. Por chisc vëgnel adotè automaticamënter la tarifa normala cun le renovamënt dl abonamënt.
Chi che à ativé pro so Südtirol-Pass la funziun de paiamënt automatica tla banca ciafa chisc dis tres internet o por posta dötes les informaziuns deborida cun le cunt.
usp
