Atualità

Ambiënt | 21.01.2013 | 14:43

Chëuta y finanziamënt per l refudam tratei dala Jonta provinziela

USP – Doi iedesc ie l refudam (NCUEI) ai 21 de fauré stat argumënt dla senteda dla Jonta provinziela. N cont dla chëuta nueva TARES uelen abiné n mesun per mantenì l prinzip che premia chiche fej manco refudam. A na maniera che l custimënt dl furnel dal refudam de Bulsan ne toma nia sun la tarifes, uniral adurvà scioldi che ruva da Roma per l’energia alternativa.

La ntroduzion dla chëuta nueva sun l refudam y servijes TARES ti va ala Jonta provinziela defin de traviers. Da ani an tl Südtirol fat na politica per la spartizion y la reduzion dl refudam. "Son dla minonga che chiche spartësc l refudam y ne n fej de manco, dëssa nce unì premià. Ma chësc ne ie nia udù dant tla TARES" à dit l presidënt Luis Durnwalder. Da pert dl Stat iel udù dant che sciche basa per calculé la tarifa, vëniel me tëut ca la spersa dl cuatier. La tarifes de 115 chemuns sun 116 de dut Südtirol, ie mpustedes defin al cuntrer y tën cont dla cuantità de refudam che vën dat jù.

Per mantenì chësc prinzip nce pra la TARES, sënta la Jonta provinziela sun mudazions giuridiches. "Ne on dessegur nia parola per schivé la ntroduzion dla chëuta nueva, ma pudon cialé de arjonjer n adatamënt sun la basa dla calculazion" à spiegà l presidënt dla Provinzia do la senteda dla Jonta. L prinzip de paië aldò dla cuantiteies de refudam ie unì metù per stravardé l ambient y ajache l ie plu giust.

L segondo pont che reverda l refudam à da n fé cun la nutizia da Roma che la Provinzia à venciù n cuncors per la produzion de energia alternativa. Chësc pest à fat gran plajëi ajache la unerea l lëur di tecnics dla Provinzia y l porta nce scioldi. L presidënt Durnwalder à rujenà de n pest danter 60 y 80 milion de euro.

La Jonta provinziela uel nuzé chisc scioldi per finanzië l mplant nuef de Bulsan Sud che se nuzea dl ciaut che vën ora a brujé l refudam. "A chësta maniera sperons de mantenì la tarifes dal refudam" à dit Durnwalder. L presidënt dla Provinzia à dit che zënza chisc scioldi dl pest, mesessel bonamënter unì auzà la tarifes de trëi iedesc mo n tant per i raions che ie plu dalonc dal mplant de Bulsan.