Sanité / Sozial | 28.01.2013 | 15:28

Graduatories spartides per aiuc per l cuatier (cun audio)

USP – La Chëurt costituzionela ne à nia azetà la regulamentazion provinziela che imigrei da ora dl’Europa giate permò do cin ani de residënza aiuc provinziei per l cuatier. La Jonta provinziela à (NCUEI) ai 28 de jené fat ora de se paré da speculazions de fulestieres te chëla che l vën mantenì la graudatories spartides.

Sce la Provinzia muessa la zeder n cont dla tlausula di cin ani de residënza, dan pudëi damandé aiuc provinziei, uel i assessëures provinziei tré tres la graduatories spartides. Chësta dezijion se stiza sun na sentënza a livel europeich, che lascia pro graduatories spartides a cundizion che l vënie tenì cont di medemi criteries. "I imigrei possa majera pert mustré su che i davania de manco, che i vif de trueps te n pitl cuatier y che i à truep mutons. Permez a de tel cundizions ne à i zitadins da tlo nia plu gran puscibltà de giapé aiuc provinziei" à spiegà l presidënt Luis Durnwalder te cunferënza stampa.

Sce l ne possa nia unì tenì cont di ani de residënza, pona tol la Jonta provinziela la streda dla graduatories spartides. Nscì iel unì dat pro che per i zitadins che vën da ora dl'Europa vëniel metù a desposizion 14,16 percënt di cuatieres soziei, chësc fej ora 61 de ndut 373 cuatieres che l IPES sëurandarà chëst ann. Per cumpré o frabiché n cuatier giata i zitadins da ora dl'Europa 10,16 percënt di scioldi udui dant. I zitadins nia europeics fej ora 5,9 percënt dla populazion dl Südtirol. De ndut juda la Provinzia a paië l fit, a frabiché o cumpré n cuatier cun 73,6 milion de euro. De chisc scioldi ie 7,48 milion udui dant per zitadins da ora dl'Europa: 1,48 per frabiché y 6 milion per l fit.

La Provinzia de Bulsan dà ora de majeri aiuc per l cuatier che no d'autri raions. Perchël vëniel cialà che chisc aiuc ne tire nia adalerch fulestieres ora de mesura. "Chëi che vën da oradecà muessa unì tratei y respetei sciche persones, ma messon nce cialé de schivé speculazions" à dit l presidënt Durnwalder.

as

Galaria dales fotografies

Aiuc provinziei per l cuatier unirà dai ora aldò de graduatories spartides per chëi da tlo y per fulestieres.