Atualità
Trafich te Puster, manco codes d’auti cun les previjiuns tl tëmp real sön le web
USP – Smendrì les codes d’auti ti dis critics y dales ores olache al é le majer numer d’auti sön la strada statala de Puster: La Junta provinziala laôra bele dî a chësc travert y s’anüza dl web por l’arjunje. Dai 31 de jenà (INCÖ) é le portal www.previsionetraffico.bz.it, che pîta informaziuns tl tëmp real sön la viabilité sön lla strada statala 49, online.
Provinzia, comuns, comunitês raionales, forzes dl ordinn, RAS, autostrada dl Prener, SMG y la lia di ostis: düć incër na mësa ia por ciafè na soluziun por le trafich te Puster. "Dantadöt la sabeda - à splighé l'assessur por i laûrs publics Florian Mussner – él gnü as’al dè codes che à tignì sö le trafich sön döta la SS 49 y che ara jô ma n tan da odëi danfora, porchël unse tut la dezijiun da svilupé n sistem che foss stè bun da preodëi le miù che ara va i flusc dl trafich por ti jì adincuntra ai bojëgns de mobilité di residënć y di turisć. I arati che i sunse stà bugn da arjunje de bugn resultać".
Dlungia les operes stradales che ê bele gnüdes realisades al'altëza dla portina dl daz dl’autostrada de Porsenù -Vahrn (mioramënt dl rondel, striara nöia cuntra Sterzing), les 4 tofles cun i messaji che müda che ê bele danter Bornech y Porsenù y les 6 zentralines por relevè le trafich, àn tut la dezijiun da investì sön la tecnologia. "Por mirit dla colaboraziun cun la SIAG - à sotrissé le diretur dl Sorvisc strades Paolo Montagner - él gnü svilupé n software che é bun da cöie adöm i dać sön le trafich y da fà previjiuns sön i flusc cun na perzentuala alta de afidabilité. I sun passà da na fotografia dla situaziun a na previjiun de ći che podarà sozede, n pü’ sciöche cun les previjiuns dl tëmp".
Chëstes previjiuns é da ciafè da incö inant sön la plata internet www.previsionetraffico.bz.it, che ne fornësc nia ma ajornamënć sön le trafich danter St.Sigmund /Kiens y la portina dl daz dla A22, mo inće les previjiuns por chël dè y inće por i set dis che vëgn do. Sön le sit él da ciafè informaziuns sön le flus stradal y le tëmp preodü. "Ara se trata de na pera miliara sön chëra che an mëss laurè tl dagnì por normalisé le trafich sön la statala 49", à dit le presidënt dla Comunité raionala de Puster, Roland Griessmair.
"I sperun che i dać che é sön la plata internet - à dit Mussner – che sarà inće a desposiziun di turisć ti hotì, portes pro a sensibilisé chi che va cun l’auto, y a smendrì le trafich". Indöt él gnü investì te dui agn 300mila euro tl proiet, 25mila por le svilup dl software y le rest por les operes stradales (rondel y striara dla portina dl daz de Porsenù, cumpra dles tofles dai messaji che müda). La A22 à daidé curì les spëises cun feter 180mila euro.
usp
Galaria dales fotografies
