Atualità
Jonta provinziela sustën l svilup economich cun la Südtirol Finance
USP – Cun la fundazion dla sozietà “Südtirol Finance AG” uel la Jonta provinziela mëter a jì n strumënt de sustëni al’economia de 250 milion de euro. I assessëures provinziei à (NCUEI) ai 04 de fauré tratà i statuc che ie n majera pert bele azetei. Aldò dl presidënt dla Provinzia Durnwalder ie mo da stlarì la culaburazion danter la sozietà nueva y la Jonta provinziela, a na maniera che posse unì coordinei i pruvedimënc da tramedoi pertes.
Cun la "Südtirol Finance AG" se stiza la Jonta provinziela sun n model per sustenì l'economia che ie bele unì sperimentà te d'autri raions. N ejëmpli ie tlo l Trentino cun la "Trentino Sviluppo". Cun 250 milion metui a desposizion dala Region, dëssa la sozietà nueva pité aiuc che va mo sëuraprò a chëi dla Provinzia, per judé firmes ruvedes ala strëntes, per n fond de rotazion y per cunsulënza n cont de tueda.
I statuc ne à mo nia pudù unì dai pro ajache l ie mo da stlarì miec l raport danter la Sozietà y la Jonta provinziela. "La se trata che i pruvedimënc da tramedoi pertes vënie coordinei bën, schivan lëures dopli. Ntan la proscima enes uniral stlarì co che pudëssa cialé ora na tel culaburazion" à dit Luis Durnwalder.
as
