Atualità
Jonta provinziela azetea program di lëures publics da 150 milion
USP – Per stredes y frabiches dla Provinzia iel per chëst ann unì prugramà lëures per n custimënt de passa 150 milion de euro. La Jonta provinziela à (NCUEI) ai 18 de fauré dat pro i programs prejentei dal assessëur Mussner.
Per la frabiches iel unì prugramà 47,8 milion de euro y de chësta soma ie 8,7 milion destinei per finé lëures bele scumencei. "Una dla prioriteies dates prò ie l ressanamënt energetich per la cëses provinzieles, per chël che l ie udù dant 14,3 milion de euro" à dit l presidënt dla Provinzia Durnwalder do la senteda dla Jonta. I majeri capituli te chësc program reverda trëi strutures scolastiches a Bulsan: la scola auta per l cumerz Kunter, la scola da geomerter Anich y la palestra dl lizeum per rujenedes modernes Stifter. A Maran iel prugramà n zënter per i servijes de Crëusc Blancia y Cuecena.
Per frabiché stredes à la Jonta provinziela dat pro n nvestimënt de 83,6 milion de euro. Cun 69 milion ie tlo na majera soma bele destineda a lëures scumencei. "Tl program de frabiché stredes se tratela dantaprima dla zircunvalazions de Maran, Auer y Leifers. Pona unirà mo leprò l segondo toch dla zircunvalazion de Vandoies" spiega l assessëur ai lëures publics Florian Mussner. Tl program 2013 iel prugramà de jì inant cun i lëures sun la streda dla val Sarentin y de scumencé a miuré la streda da Blumau a Völs. La prioriteies per 15 milion de euro unirà dates pro tla proscima senteda dla Jonta provinziela.
La Jonta provinziela à sëuraprò nce azetà n nvestimënt de 18 milion de euro per lëures ti spediei de Sterzing, Maran y Sulaneres/Schlanders.
as
Galaria dales fotografies
Landeshauptmann Durnwalder zu den Investitionen im Straßenbau
- Scarica il file audio 392 kb
