Atualità
Premià i proiec per la capitela culturela 2019
USP – Per la miëura ideies dl cuncors metù a jì dal Cumité de candidatura per la capitela culturela 2019, iel (NCUEI) ai 18 de fauré unì sëurandata i pesć. Per i miëur diesc proiec à i assessëures provinziei ala cultura sëurandat 4500 euro per un.
Nchin ai prims de dezëmber à la lies cultureles pudù prejenté ideies per sustenì la candidatura dl Südtirol deberieda cun l Nordest dla Talia per daventè capitela europeica dla cultura 2019. "L nes sta a cuer che la candidatura vënie purteda da na basa lergia y de tré ite nce la lies cultureles acioche i se feje pensieres sun proiec che pudëssa unì realisei sce la candidatura va a bon fin" nscì i assessëures provinziei ala cultura Kasslatter Mur, Tommasini y Mussner.
Per chësc cuncors scrit ora dala Provinzia iel unì mandà ite 38 proiec, de chëi che la giuria à pona cris ora i diesc miëures. La premiazion ie unida fata tl zënter culturel "Trevi" a Bulsan deberieda cun i trëi assessëures provinziei ala cultura. La miëura valutazion à giapà l proiet "Lichträume - Fiat lux" dl Südtiroler Künstlerbund, dan la lies "Fabbrica del tempo", che à ambientà si proiet ai raions ndustriei storics, y l proiet "Lungomare" ("Territorio e cultura materiale"). Danter i premiei iel nce l proiet "Fanes-Poem musical" cun tesć de Roland Verra y la mujiga uriginela de Susy Rottonara.
L cuncors de ideies à nce fat pië via na fasa nueva dla candidatura. Sce tla prima pert se tratovela dantaprina dla pert urganisativa, se tratela śën de lauré ora n documënc de candidatura. "Chël che unirà śën laurà ora ruverà tl documënt che muessa unì dant ju nchin ala fin dl ann" spiega Mussner. La candidatura se stizerà ala corelazion danter cultura y economia, ajache n ie dla cunvinzion che la cultura ne ie nia me de mpurtanza per la cumenanza, ma la posse nce de si cuntribut al bënsté economich.
as
