Atualità

Trafich | 21.02.2013 | 09:57

Fermada dla ferata nöia pro l’ospedal da Bornech

USP – Tl dagnì bastaràl ma plü püć vari por rové dal ospedal da Bornech ala fermada dla ferata. Por chësc ann d’isté vëgnel preodü da podëi daurì la fermada nöia Bornech Nord. Chësc é ći che l’assessur Widmann à lascè alsavëi ai 20 de forà pro la presentaziun dl proiet.

„Cun la fermada nöia a Bornech ciafa l’ospedal n azès diret ala ferata, por le rest ti vëgnel pité de plü poscibilitês y na majera flessibilité y autonomia por ći che reverda la mobilité inće ala jënt che vir ti raiuns abitatifs ilò dlungia", dij l’assessur provinzial. „Implü passenëia la fermada nöia ite bun ti orars“, à ajuntè l’assessur. „Cun la costruziun de staziuns dla ferata y fermades nöies indlunch olache ara va da arjigné saurì n azès, orunse condüje la ferata plü davijin ales porsones". Aladô dl departimënt por la mobilité podess la fermada nöia gnì adorada da feter 1.300 passajiers.
Mo i laûr é complicà, dij l’assessur. La scina y la condüta dla forza eletrica messarà gnì spostades n pü’ y la tecnica de segnal messarà gnì conzepida danü.

La fermada dla ferata nöia pro l’ospedal da Bornech costarà rodunt 1,7 miliuns de euro. Al gnarà fat na plataforma a d’assosta de 150 metri, n salf da aspetè y locai tecnics. Implü gnaràl fat plazes da lascè la roda a d’assosta y n sotpassaje por chi che va a pé y cun la roda, a na moda da garantì le coliamënt cun i raiuns abità dlungia y la strada d’azès di stödafüch.

Ćina d’altonn dl 2014 déssel inće gnì fat na fermada nöia a Vierschach. Ara costarà incër 1,7 miliuns de euro y al gnarà fat na plataforma a d’assosta 160 metri lungia y n salf da d’aspetè.

USP