Atualità
Programs y frecuenzes nueves cun l radio digitel
USP – Chiche scota su l radio digitel (DAB) muessa ntant la proscima enes muever l sistem per crì la frecuenzes da nuef. Chësc ie de bujën ajache la frecuenzes DAB ie al livel statel unides regulamentes da nuef. Tl Südtirol puderan audì cater programs nueves: l program per mëndri y jëuni "KiRaKa" dl Westdeutscher Rundfunk (WDR) y trëi programs svizeri.
Davia che tla Talia uelen purté orden tla cunfujion de frecuenzes, vënieles dates ora da nuef. Tl Südtirol iel perchël de bujën de na mudazion dla frecuenzes digigteles DAB. Aldò di esperc dl'Azienda de radiotelevijion RAS ie la mudazion drët scëmpla: l tleca lascé jì l sistem che chier da nuef la frecuenzes. Chësc possa unì fat danter l 11 y 22 de merz canche i programs radio digitei dla RAS ne sarà nia plu da audì sun la vedla frecuenzes.
Pra i radi digitei de prima generazion possen tres l sistem de crissa audì inò duc i programs digitei dla RAS che n audiva nchinamò (Ö1, Ö2 Radio Tirol, Ö3, FM4, Bayern1, Bayern2, Bayern 3, Bayern Klassik, Bayern 5 Aktuell, Swiss Jazz, Radio Rumantsch, Radio Uno, Radio Due, Radio Tre, RAI Sender Bozen).
Pra i radi digitei plu nueves, chëi che ie unic cumprei ntan i ultimi doi ani, possen abiné su programs sëuraprò. L se trata de "Deutschlandradio Kultur" y di trëi programs svizri "Swiss Pop, Swiss Classic y Rete due".
Cun duc i radio digitei puderan audì n program nuef. "Per l prim iede puderan tres la RAS audì n program ntier dedicà a mëndri y jëuni" spiega l'assessëura Sabina Kasslatter Mur. L program "KiRaKA" (KinderRadioKanal) pieta uni di dala sies da duman nchin la diesc da sëira stories, nutizies, reportajes y mujiga. Danmesdì ie l program dedicà ai plu pitli, dala doi domesdì scumëncia dla trasmiscion per sculeies dl'elementera y da sëira via vëniel pità n program per i jëuni. De nuet, danter la 22.00 y la 06.00 puderan audì l program de mujiga "1LIVE diggi" dl WDR per jëuni.
as
