Atualità
Segurëza por chi che va a pé sön les strades dla Val Badia
USP – Por smendrì le prigo de desgrazies sön strada, ne investësc le Sorvisc Strades provinzial nia ma plü sön la sensibilisaziun, mo inće sön provedimënć che reverda les strades. Danter na linia de laûrs che é gnüs fać te döt le Südtirol él inće dui laûrs realisà tla Val Badia.
Inće sce vigni desgrazia sön strada é tragica, é les strades dl Südtirol deventades plü sigüdes ti ultimi agn. "Ann por ann sozédel manco desgrazies sön strada, le numer dles porsones che s'à fat mè s'à arbassè y le numer di morć é jü jö dassënn" dij l'assessur Florian Mussner fajon referimënt ai tröc provedimënć che é gnüs realisà dal Assessorat por i laûrs publics por miorè la segurëza sön strada.
Dl 2002 él stè 2060 desgrazies sön les strades dl Südtirol, 2665 feris y 89 morć. "Sce i paridlun chëstes zifres cun chëres dl 2011 odunse i vari inant che é gnüs fać" dij Mussner. Dl 2011 él stè scialdi manco desgrazies, mo tres ćiamò 2004 cun 1627 feris y 42 morć. "Al é bëgn tler che vigni desgrazia, dantadöt vigni vitima, é demassa. Mo al é inće tler che les strades é deventades plü sigödes" spliga l'assessur provinzial fajon referimënt al'Uniun Europeica che s'â tut dant da smendrì dl mez le numer di morć sön strada. "Nos ùn arjunt n majer travert" dij Mussner. De importanza é inće l'indesc di morć pormez ales desgrazies. Dl 2002 él stè pro le 4,32 porcënt dles desgrazies sön strada n mort, dl 2011 é chësc indesc jü jö a 2,58 porcënt.
Les rajuns dl mioramënt dla segurëza é desvalies. Da öna na pert é miorada la tecnica y les regoles dla strada. Laprò röia inće les campanies de sensibilisaziun dl Assessorat por i laûrs publics. Dal'atra pert, y bonamënter ćiamò de majera importanza, é i provedimënć che é gnüs realisà sön strada. Le Sorvisc Strades à naôta ćiarè tl raiun dla Val Badia dla segurëza de chi che va a pé. N ejëmpl é le marciapîsc a Longega o a Sompunt, tl comun de Badia, olache al é inće gnü avalié la strada por miorè la visibilité.
usp
Galaria dales fotografies
