Atualità
Prima senteda dla cumiscion paritetica per i programs tudësc y ladins dla RAI
USP – Ala fin dl ultimo ann ie unì marciadà l program de servisc cun la RAI, pra chël che zapa ite per l prim iede nce la Provinzia. (INIER) Ai 7 de merz se à la cumiscion paritetica danter Stat, RAI y Provinzia ancuntà per l prim iede a Roma per stlarì i prim vares per aumenté l tëmp de trasmiscion y per n renuvamënt tecnich.
I programs de radiotelevijion tla rujeneda tudëscia y ladina dla RAI ie n mpëni che l Stat se ova sëurantëut. Per tenì ite chësc mpëni à l Cunsëi di ministri nchinamò finanzià la trasmiscions de mendranza dla RAI fajan for inò na cunvenzion danter la RAI y l Cunsëi di ministri. Tl cuntrat de servisc che ie unì fat ora ai 28 de dezëmber 2012 iel per l prim iede la Provinzia che sëurantol l custimënt dla trasmiscions de mendranza dla RAI de Bulsan. „Chësta sort de cunvenzion ie n model defin nuef che porta bele si prim fruc y che fej a na maniera che la RAI posse fé inant si atività“ dij l vizediretëur generel dla RAI Gianfranco Comanducci.
Aldò dl cuntrat de servisc nuef per trëi ani iel udù dant na cumiscion paritetica danter Provinzia y RAI per mëter n droa l’acurdanza, y chësta se à ntant ancuntà per l prim iede tl palaz Chigi a Roma. Da pert dl Cunsëi di Ministri ie Ferruccio Sepe y Roberto Marino tla cumiscion, la Provinzia ie reprejenteda dal diretëur generel Hermann Berger y Klaus Luther, diretëur dla presidënza dla Provinzia. Da pert dla RAI iel deberieda cun Comanaducci nce l diretëur d’aministrazion Luigi De Siervo, l diretëur dla sënta de Bulsan Carlo Corazzola y Alberto Del Cioppo dla direzion per la coordinazion dla sëntes destachedes.
L duvier te chësta cumiscion ie de nvië via l aumënt dl tëmp de trasmiscion di programs tudësc y ladins dla RAI a Bulsan. La pert de televijion ladina dëssa unì ngrandida da 39 a 100 ëura de trasmiscion al ann, i programs tudësc de radio da 4716 a 5300 ëura. La redazion ladina dëssa pudëi lauré autonomamënter y leprò dëssel unì nvià via n program de sustëni dl personal de rujeneda tudëscia y ladina. „Dajon nce pëis che l vënie fat n adatamënt a livel tecnich y struturel dla sënta dla RAI a Bulsan“ sorissea l presidënt dla Provinzia Luis Durnwalder. La segurëza finanziela che vën a se l dé tres l mpëni dla Provinzia, lascia per l prim iede nce pro na prugramazion sun n tëmp plu lonch.
I pruvedimënc che ie de bujën per arjonjer duc chisc fins dëssa unì marciadei ora mëns per mëns te ancuntedes dla cumiscion. La proscima senteda ie ududa dant ai 26 de merz a Bulsan. A Roma iel sëuraprò nce unì fat ora de cherdé ite cumiscions per la mendranzes de rujeneda franzëusa, slovena y friulana.
as
