Politica | 18.03.2013 | 14:06

Prësc n'agenzia per cialé do i cuatieres cunvenzionei

USP - Per cialé do che i cuatieres cunvenzionei vënie nce nuzei da jënt cun residënza, che ne à nia mo cuatieres, dëssel unì njenià n’agenzia de cuntrol a livel provinziel. La Jonta provinziela à (NCUEI) ai 18 de merz nciarià l assessëur Tommasini de tò su cuntat cun l’Assoziazion di chemuns per nvië via na tel agenzia.

La regula di cuatieres cunvenzionei fova unida metuda su per schivé l vënder ora dl ncësa y per resservé la cubatura a desposizion ala jënt da tlo. "Majera pert di chemuns ne ie nchinamò nia stai boni de fé i cuntroi sciche udù dant dala lege y perchël iel cënc de cuatieres che vën nuzei ora de regula" à dit l presidënt Luis Durnwalder do la senteda dla Jonta provinziela, sorissan che chisc cuatieres à me pudù unì frabichei per la jënt da tlo y perchël muessel nce unì cialà do che la regules vënie respetedes. L ne ie nia drët che velch adrova per atività turistica cuatieres cunvenzionei destinei ala jënt dl post.

L'Assoziazion di chemuns ova bele damandà n'agenzia de cuntrol a livel provinziel. La Jonta provinziela à śën nciarià l assessëur Christian Tommasini de tò su cuntat cun l'Assoziazion di chemuns per nvië via na tel agenzia de cuntrol.

Canche i chemuns porta ite tl plann urbanistich raions de espanscion nueves, muessa l 55 percënt unì resservà per l frabiché alesirà (la Provinzia sëurantol mez l custimënt dl grunt y dla nfrastrutures primeres). Dl'autra pert (i 45 percënt) muessa l 60 percënt unì cunvenzionà.

as

Galaria dales fotografies

Cuatieres cunvenzionei unirà cuntrolei da n’agenzia a livel provinziel.