Desvalì | 18.03.2013 | 14:28

1,6 milion de euro per la culaburazion de svilup

USP – Bele da ani sënta la Provinzia pra la culaburazions de svilup sun trëi seves: sustëni de proiec de assoziazions ulenteres, la culaburazion ti paejes nia svilupei y la sensibilisazion dla populazion. La Jonta provinziela à (NCUEI) ai 18 de merz dat pro l program 2013 per na soma de 1,66 milion de euro.

L presidënt dla Provinzia Durnwalder, che tla Jonta provinziela se à sëurantëut dla culaburazion de svilup, à detlarà che la Provinzia jirà nce tl 2013 inant cun la trëi manieres de sustëni. "Per la sensibilisazion metons a desposizion 240.000 euro, per proiec dl'assoziazions ulenteres feter na milion y cun 400.000 euro juderà la Provinzia diretamënter vel proiet" à dit Durnwalder.

Per la sensibilisazion dla populazion iel unì mandà ite 24 prupostes y de chëstes ie 17 unides tëutes su tl program. Chisc proiec vën a custé de ndut 403.800 euro y vën sustenii cun 237.000 euro.

La segonda seva dla culaburazion de svilup ie l sustëni a proiec de assoziazions ulenteres. Tlo iel ruvà ite 61 prupostes da 45 assoziazions per na soma de 3,7 milion de euro. Da pert dla Provinzia uniral judà pea cun 2,1 milion de euro. A chësta maniera vën feter mez i scioldi a desposizion adurvei per chësta sort de sustëni.

Feter n chert di scioldi provinziei a desposizion per la culaburazion de svilup vën adurvei per finanziamënc direc de proiec. La se trata tlo de proiec tl'Uganda y Burkinia Faso. Chëst ann uniral laurà inant cun la grupes de coordinazion che fova unides metudes su dan doi ani. Sëuraprò vëniel cialà de nviei via culaburazions cun assoziazions privates tl Burkina Faso, Uganda y Sri Lanka.

L presidënt Durnwalder à cunedì che sëuraprò ai 1,6 milion de euro dla Provinzia, ruva leprò 300.000 euro dala Region.

as

Galaria dales fotografies

La Provinzia culaburea chëst ann cun 1,6 milion de euro per l svilup de raions (foto USP).