Atualità
Caia te Jonta provinziela: doi pusciblteies per la cunzescions da fé strom
USP – La Jonta provinziela y l Cunsorz di Chemuns ova nciarià l prufessëur Giuseppe Caia de na mediazion tl stritoz per la cunzescions dal’ega per fé strom y de lauré ora prupostes. (NCUEI) Ai 25 de merz à l prufessëur tëut pert ala senteda dla Jonta provinziela per scuté su la minonghes di assessëures provinziei. Per l’ena do Pasca se aspieten na si tëuta de posizion.
La prima pert dl lëur dl prufessëur Caia ie stata chëla de scuté su la posizions dla pertes nteressedes al stritoz per la cunzescions dal'ega. Dan mëter su si relazion, à l prufessëur nce scutà su la minonghes te Jonta provinziela. "Per la prima ena de auril se aspitons na relazion dl prufessëur cun prupostes co jì inant dal pont de ududa urganisatif" à di l presidënt Durnwalder do la senteda dla Jonta. Ntant iel nce da aspité la sentënza dla suneria. Te chësc mumënt ie 12 cunzescions trates ite tla cuestion dl barat de documënc. La sentënza dla suneria provinziela de Bulsan dijerà per ciuna cunzescions che l ie de bujën de na soluzion.
Aldò de Durnwalder à l prufessëur purtà dant doi pusciblteies. Una fossa de scumencé da nuef dala situazion dan che l fova unì dat ju la dumandes de cunzescion. "Te chësc cajo unissel paredlà la prupostes dates ju y de sëurandé la cunzescions aldò di documënc uriginei" à dit Durnwalder.
La segonda puscibltà fossa de scrì ora la cunzescions defin da nuef. Chësc messëssa pona unì fat aldò dla regules nueves dl Guviern Monti, che tën belau defin me cont di priesc.
La Jonta provinziela aspiterà la relazion dl pruf. Giuseppe Caia per tò na dezijion sun la direzion sun chëla che n uel jì inant.
as
