Desvalì | 25.03.2013 | 15:08

Prudoc bio, spëisa zënza gluteina y model de sparani energetich

USP – Per pité garanzies di prudoc bio à la Jonta provinziela dat pro normes nueves. Ala persones che ne possa nia maië spëisa cun gluteina vëniel dat n sustëni finanziel. Da pert dla Union Europea iel unì recunesciù n proiet de sparani che dëssa vester de ejëmpl.

Normes per prudoc bio
La Provinzia de Bulsan uel dé garanzies sun la produzion de prudoc bio. Per chësta rejon à la Jonta provinziela dat pro normes sun la produzion y ulá che l possa unì metù su l'etichëta aldò.

Aiuc a cumpré maië zënza gluteina
L maië alternatif ala spëisa cun gluteina ie per si produzion limiteda do la rata cëre. La Jonta provinziela à dat pro de judé finanzieramënter chëla persones che ne possa nia maië spëisa da gluteina. Per chësta rejon iel unì dat pro n cuntribut da 45 nchin a 104 euro al mëns aldò dl'età dla persona.

Model de sparani energetich a Bulsan
40 percënt de energia dëssa sparanië n ridl nuef che unirà ti proscimi cin ani frabicà a Bulsan. Chësc model de sparani energetich à giapà la recunescënza dala Union Europea cun n finanziamënt de 8 milion de euro. "L recunescimënt per l proiet 'Sinfonia' ie n suzes per l lëur dla istituzions che à laurà pea y nce per l'Euregio che à coordinà la scumenciadiva sëura la sëides" se ncunforta l presidënt Luis Durnwalder. L proiet "Sinfonia" ie unì valutà l segondo miëur. Per la pert che reverda la provinzia de Bulsan à fat pea l Eurac, l Istitut per cuatieres soziei IPES, la SEL y l'Agenzia Cësa tlima. Ëi se à tëut dant na lingia de proiec liei danter ëi te ridli piloc a Bulsan. La vela de pruvedimënc va da ressanamënc energetics de frabicac nchin a curì l bujën de energia cun funtanes alternatives sciche l sciaudamënt a destanza.

Bulsan deventerà a chësta maniera n model de sparani energetich. L presidënt dla Provinzia à sëuraprò ai vantajes ecologics nce fat referimënt ala ncëries per la firmes che segurea a chësta maniera stieres. "N tel proiet da pudëi mustré ca te n ciamp tan zentrel sciche chël dl'energia ie n gran retlam per l Südtirol" à dit Durnwalder.

as