Atualità
Jonta provinziela fina de traté la lege urbanistica
USP – La Jonta provinziela à (NCUEI) ai 02 de auril finà de traté la pruposta de lege sun l’urbanistica. “Ntan l’ena uniral laurà ora n test, che ulon dé pro formalmënter tla proscima senteda” à detlarà l presidënt Luis Durnwalder. Te chësta ultima senteda se ala dantaprima tratà de raions de produzion, spusté cubatura y la mudazion de destinazions.
Una dla majera pertes dla verscion nueva dla lege urbanistica ie la reforma dla partizion de raions de produzion. "Ulon scurté dassënn la pruzedures a na maniera che la firmes ne muessa nia aspité massa giut sun n grunt per se fé su na sënta" à dit l presidënt dla Provinzia. La reforma laureda ora dal assessëur Thomas Widmann vëija dant che la despuscions possa me unides fates te caji de ezezion. De norma dëssel unì tratà danter la firma nteresseda y l patron dl grunt, a na maniera che la vede plu debota.
N cont dla problematica de spusté cubatura, se ala dantaprima tratà de caji ulache l grunt ie unì tlassificà raion de pericul. "Da una pert vala de garantì che i patrons posse realisé si cubatura te n auter post, ma dal'autra pert messons schivé speculazions y frabicac ora dl zënter" à dit l presidënt dla Provinzia. Tla pruposta laureda ora dal assessëur Pichler Rolle iel udù dant i criteries per spusté cubatura a cundizion che l frabicat nuef vede a sëida cun raions bele frabichei y ne vënie nscila nia fat su amez a n pra.
L terzo pont tratà tla prima senteda d'auril reverda la destinazion de locai, che dëssa deventé plu flessibla. "Tl cajo de Bulsan iel de massa locai da ufize y massa puec cuatieres" à dit Durnwalder. Sun na tela dëssel vester puscibl mudé la destinazion da ufize a cuatieres, tenian cont dla cundizions damandedes.
Ntan l'ena uniral adatà i tesć dla pruposta de lege aldò de tant che ie unì fat ora te Jonta a na maniera che possa unì dat l bënsté ufiziel dal Presidënt dla Provinzia. Do chësc, puderà la pruposta unì mandeda inant al Cunsëi di chemuns.
as
