Atualità
Sotscrì la costituzion dla Südtirol Finance AG
Garanzies per l esport, aiuc de nvestizion o la partezipazion a modiei de finanziamënt dl fond de pension da tlo (sciche pra l “sparani per n cuatier”): la lista de duvieres che se sëurantol la sozietà nueva Südtirol Finance ie longia. Chisc dis à l presidënt dla Provinzia Durnwalder y l assessëur ala finanzes Bizzo nvià via ufizialmënter l mëter a jì de chësta sozietà, sotscrijan l documënt de costituzion.
Do che la Jonta provinziela ova tëut la dezijion de mëter su la Südtirol Finance AG y la lege provinziela aldò, iel per ntant unì fat l ultimo var ufiziel per nvië via la fundazion. Cun la sotscrizion dl documënt de fundazion à l presidënt dla Provinzia Luis Durnwalder y l assessëur Roberto Bizzo metù su formalmënter la sozietà nueva. Chësc ie unì fat deberieda cun Peter Oberpaleiter che sarà l presidënt de costituzion. Tl documënt de costituzion dla sozietà iel unì metù jù l fin dla Südtirol Finance: cuntribuì y sustenì l svilup economich dl Südtirol tl cheder dla normes provinzieles y la prugramazion economica y dl raion.
"La Südtirol Finance ie n strumënt sëuraprò de nosta politica de sustëni al'economia tres chëla che pudon tò pruvedimënc aslune y cun flessibltà a na maniera da sustenì l svilup economich" dij l presidënt Durnwalder. Per pudëi fé chësc, muessa la sozietà nueva nce avëi capital da desposizion. "Per l finanziamënt dla sozietà pudons se nuzé de chël che la Region à metù sun na pert, a chësta maniera ti spieta 250 milion de euro a uni provinzia" dij l assessëur Bizzo.
Co che l capital dla Südtirol Finance AG unirà nuzà, ie ënghe unì metù tl documënt de costituzion. L pudëssa unì anjenià n fond de rotazion per finanzië nvestizion dla firmes, la Südtirol Finance pudëssa nce fé pea pra strumënc de finanziamënt ulache ie bele l fond de pension da tlo o sëurantò garanzies de esport. Duc i duvieres dla sozietà nueva muessa unì sëurandai dala Jonta provinziela che ti stajerà do al svilup dla sozietà. (USP)
as
