Atualità
Museums Ladin, Ursus Ladinicus y Gherdëina pra l di nternaziunel ai 12 de mei
N dumënia 12 de mei puderan vijité majera pert di 43 museums y abinedes debant. N ucajion dl di nternaziunel di museums pieta nce l Museum Ladin, la sënta “Ursus Ladinicus” y l Museum de Gherdëina n program speziel. Carolina Kostner fej pea l azion “Scrin di recorc”, Simon Kostner conta stories da rì y da sëira sona la grupa Nolunta's.
L di nternaziunel di museums pieta la sëula ucajion ntan l ann de vijité feter duc i 43 museums y abinedes tl Südtirol debant. A chësta maniera possa families y duc i nteressei se rënder cont dla gran varietà che i museums pieta tla provinzia de Bulsan.
L cuer de chësc di speziel sarà la scumenciadiva "Scrin di recorc". Mendri y majeri ie nviei a tò pea vel cossa che ti sta drët a cuer cun chëla che i à n liam de recorc, de emozions o ntraunides de mpurtanza particulera. Tl museum uniral pona fat na foto y cataloghisà l pez a na maniera da pudëi deventé pert de n museum virtuel sun internet. Ntan l di nternaziunel di museums puderan udëi tres internet co che chësc museum virtuel devënta for majer. L pez persunel puderà sambën riesc inò unì tëut pea a cësa. Chiche fej pea la scumenciadiva "Scrin di recorc" possa vëncer de biei pesć.
Tl Museum Ladin a San Martin de Tor saral Carolina Kostner a judé i mëndri a crì na luegia per si oget dl cuer. La campionëssa dl mond de jadiné sarà dala trëi dala cinch domesdì tl Museum Ladin Ciastel de Tor.
Dala nuef da sëira sunerà la grupa Noluntas sun nvit dl Sorvisc ai Jogn tl Museum Ladin.
Tl Museum Ursus Ladinicus a San Ciascian puderan n dumënia scuté su l autor Simon Kostner che conta stories da rì y che fej matades cun l publich. Chësta ucajion unirà piteda dala 10:30 nchin la 17:30. Danmesdì nchin do marënda menerà l paleontologh Herwig Prinoth tres l Museum Ursus Ladinicus prejentan danter auter la geologia dla Dolomites, la lores de Conturines y la lores nueva M12.
Danter la doi sëntes dl Museum Ladin furnerà n taxi debant: l servisc da San Martin unirà pità dala 13:30 ala 17:30 y chël da San Ciascian demez dala 14:00 nchin la 18:00.
Nce Museum de Gherdëina fej pea la scumenciadiva "Scrin di recorc". Dala 14:00 nchin la 18:00 puderan cialé pro co che l vën turnà vedla chiena de Gherdëina, co che l vën depënt chiena y co che n possa tré sëura la popes da fé damat. Tla sala dla scultures puderan udëi lëures te chëi che sculeies dl Lizeum d'Ert "Cademia" à reinterpretà "clochard" y juesc de lën.
L program ntier dl di nternaziunel de duc i museums y abinedes dl Südtirol ie publicà sun la plata web www.giornatadeimusei.info. (USP)
as
Galaria dales fotografies
