Atualità
Le turism incunta l’agricoltöra: l’ediziun dl concurs 2013 pëia ia
Inier, ai 7 de mà dl 2013 él pié ia la terza ediziun dl concurs de idees “Tourismus trifft Landwirtschaft – Il turismo incontra l’agricoltura” a livel dl’Euregio cun le Südtirol, le Tirol y le Trentin. Tres chësc concurs vëgnel chirì proieć de cooperaziun te chisc dui seturs strategics por i raiuns alpins.
Bele da agn sostëgn la Provinzia proieć de cooperaziun danter le turism y l'agricoltöra, danter chisc inće le concurs de idees "Tourismus trifft Landwirtschaft - Il turismo incontra l'agricoltura" che en chësc ann é rové a süa terza ediziun. Le concurs dà la poscibilité da laurè fora proieć inovatifs por valorisé la colaboraziun danter turism y agricoltöra.
Al concurs pol tó pert zitadins y porsones iuridiches (aziëndes, comuns, assoziaziuns, istituziuns, o scores) da düć trëi i paîsc dl'Euregio, chël ô dì dal Südtirol, dal Tirol y dal Trentin, che presentëia scomenciadies bele portades a fin o tl laûr da gnì realisades sciöche inće idees y proieć che podess gnì realisà y che porta pro a sostignì la cooperaziun danter turism y agricoltöra. Les domandes po gnì dades jö ćina en vëndres, ai 2 d'agost dl 2013.
De plü informaziuns por ći che reverda chësc concurs ciàfon sce an chërda sö le numer de telefonn 0471 289087 o sön la plata internet www.tla-euregio.info o tres email a info@transkom.it. Na iuria chir fora ćina da d'altonn chi che davagna i pesć che à n valur total de indöt 6000 euro. (USP)
usp
