Atualità
Liber deberieda per deventé plu cuscienc dla storia
La trëi grupes de rujeneda dl Südtirol valutea la storia da si pont de ududa. L liber de storia che ie unì prejentà (NCUEI) ai 09 de mei a Bulsan ie unì fat da esperc de duta trëi grupes y ie per duta trëi grupes de rujeneda: l dëssa judé pro a deventé plu cuscienc dla storia deberieda y a chësta maniera a na miëura cunvivënza dla grupes de rujeneda.
L liber sun la storia dl Südtirol dal 1919 a ncuei ie l terzo y ultimo liber de na lingia anjenieda sun ncëria dla Jonta provinziela. Cun chisc trëi libri ie uni un nvià a se dediché ala storia che la trëi grupes de rujeneda à vivù deberieda. Cun chësc proiet iel unì laurà su la storia y anjenià n mesun per la dé inant a na maniera saurida da capì.
La grupes de rujeneda valutea la storia a na maniera defrënta: "emozionalmënter sënt un de avëi venciù y l'auter de avëi perdù. L tleca pensé al monumënt dla vitoria a Bulsan" à dit l assessëura Kasslatter Mur pra la prejentazion dl liber. Per chësta rejon se tratela che la jënt devënte plu cuscienta dla storia deberieda. L liber laurà ora sun basa scientifica pieta na basa deberieda per arjonjer chësc y per madurì plu cumprenscion per l'autra grupa de rujeneda. "Sce cunescion la storia se fajons plu saurì a capì la situazion dl'auter y a capì la tëmes" à dit l assessëur ladin Mussner. La mira dla lingia de trëi libri de storia deberieda per duta trëi grupes de rujeneda ie de sustenì la cunvivënza dla trëi grupes y de vester n pont de referimënt tl mpëni per la pesc. Aldò dl assessëur Tommasini ie l liber de bujën per na cunvivënza plu madura: "pudon lauré per l daunì sce ti jon permez ai grops che ie restei dai tëmps passei".
L terzo liber sun la storia dl Südtirol trata dl tëmp canche l ie ruvà pra la Talia, i ani dl fascism y dl nazionalsozialism, i atentac di ani sessanta y la furmazion dl'Autonomia nchin al didancuei. De ndut iel 268 plates spartides su te cater majera pertes. 11 capituli ie dedichei ala grupa de rujeneda ladina. "Tla publicazion de chësc liber de storia ie i ladins unì trai ite dassënn y l vën nce dat respostes cuncretes" à sorissà l assessëur Florian Mussner.
Tla pert che reverda l tëmp danter la doi gran vieres vëniel spiegà la situazion di ladins do la prima viera, la spartizion politica di ladins, la politica fascista tla valedes ladines y l'economia ti luesc ladins. La pert che trata l tëmp dla segonda gran viera vëniel prejentà l'opzion tla valedes ladines, l trasferimënt di ladins tl rëni tudësch y la viera tla valedes ladines. La terza majera pert dl liber, chëla che trata l tëmp do la viera nchin al pachet, prejënta la cuestion di ladins te chësc tëmp y l sistem scolastich paritetich. Ala tlausules de defendura per i ladins y l mond ladin al didancuei ie dedichei doi capituli tla cuarta pert dl liber de storia.
L liber tla verscion tudëscia y taliana ie unì scrit dai cin autores Giorgio Mezzalira, Luciana Palla y Martha Verdorfer deberieda cun i co-autores Stefan Lechner y Alessandra Spada. La pert che reverda la grupa de rujeneda ladina ie dantaprima unida laureda ora dala storica Luciana Palla de Fedom. Tla grupa de cunsulënza scientifica à nce laurà pea l ntendënt Roland Verra.
L liber de storia che pensà per i zitadins dl Südtirol de uni età ie unì stampà 7.000 iedesc y unirà adurvà tla scoles autes. N l giata da cumpré tla butëighes dai libri al priesc politich de 19,90 euro. (USP)
as
Galaria dales fotografies
