Atualità
Dagns ales strades gaujà dal invern: finanziamënć implü y intervënć de priorità
Spostamënć de ressurses finanziares internes, mesi finanziars implü y na lista dles prioritês ch’al é da afrontè: tl Departimënt por i laûrs publics dla Provinzia vëgnel laurè dassënn por tó y jì i dagns gaujà dal tëmp da d’invern ales strades tl Südtirol. “En chësc ann adorunse gran pert di finanziamënć dl Sorvisc strades por cuncè fora l’asfalt dles strades” alza fora l’assessur Florian Mussner.
Te tröc posć de nosta provinzia é l’asfalt dles strades do la sajun da d’invern te de stletes condiziuns. “Al nes röia adalerch segnalaziuns da döta la provinzia y i savun pö sciöche la condiziun dles strades é do dal’ultima sajun da d’invern cun cotan de plöies y novüdes y temperatöres basses” dij Mussner. “Baldi ne po chisc dagns nia gnì cuncià fora da incö a en doman en conscidraziun de na rëi de strades “vedles” de 2700 km y dles strades nöies sciöche te Puster, tla Val Venosta, a süd de Balsan o a Porsenù” spliga l’assessur Mussner.
Impò vëgnel laurè dassënn por cuncè fora i sëgns lascià dal invern sön nostes strades. “I ùn analisé y ćiarè jö danü döt le program de manutenziun por abiné i mesi finanziars che basta por fà i intervënć” sotrissëia Mussner. Ara é jüda da recuperè 2,8 miliuns de euro deache al é naôta gnü fat ademanco de investiuns por ći che reverda mascinns dl Sorvisc strades. Laprò röiel ćiamò 1-2 miliuns de euro che la Junta provinziala à metü a desposiziun dl program de manutenziun tla sentada da en lönesc.
Danter spostamënć tl bilanz intern y finanziamënć implü pol gnì garantì i investimënć che va debojëgn por i laûrs plü de prescia che n’ê nia programà. Ara se trata chilò da fà danü l’asfalt de strades te Puster, sön i jus, tla Val d’Ega, tl raiun dl Scilier y sön le Ritten. “Olach’ara va cunciarunse ma fora l’asfalt, te d’atri posć indere él dagns che reverda döta la costruziun dla strada y porchël jaràl debojëgn de de majeri laûrs” spliga Mussner. I laûrs por arjigné ca la manutenziun dles strades à bele metü man, i laûrs sön la lista di laûrs de prescia gnarà fać daimproia te düć i raiuns. (USP)
usp
