Atualità
Cunvenzion RAI y ferata: Durnwalder y Mussner duman a Roma
Per doi rejons furnea l presidënt dla Provinzia Luis Durnwalder duman, juebia, 16 de mei a Roma. Cun i respunsabli dla ferata se tratela de udëi tan inant che i ie cun la proietazion per l raion dla stazion dla ferata a Bulsan. Deberieda cun l assessëur ladin Florian Mussner vëniel prejentà co che unirà metù n drova la cunvenzion nueva per la RAI tudëscia y ladina a Bulsan.
La cunvenzion nueva, per i proscimi trëi ani, danter la RAI y l Stat unirà per l prim iede nce sotscrita da pert dla Provinzia de Bulsan. Chësc cumporta doi nuviteies. Aldò dl'Acurdanza de Milan sëurantol la Provinzia de Bulsan l custimënt per la trasmiscions tudësces y ladines dla RAI de Bulsan. L program de trasmiscion tla doi rujenedes de mendranza unirà ngrandì y la redazion ladina giaterà plu autonomia de lëur.
La cunvenzion y la programazion nueva sarà argumënt de na cunferënza stampa cun l presidënt dla Provinzia Durnwalder, l assessëur ladin Florian Mussner, la presidënta dla RAI Anna Maria Tarantola y si diretëur generel Luigi Gubitosi, duman ai 16 de mei, dala 12.30 tla sënta dla RAI, Viale Mazzini a Roma.
Duman juebia se anconta Durnwalder nce cun Mauro Moretti, che ie a cë dla ferata taliana. Tlo se tratela dantaprima di proscimi vares per realisé l mega-proiet per smëndrì la stazion dla ferata a Bulsan y, tres n barat, de fé su n ridl nuef tl zënter de Bulsan.
as
