Atualità
“Ćiases dl savëi” - referat ai 30 de mà tla Teßmann
La costruziun de biblioteches al dedaincö, les "Ćiases dl savëi” é l’argomënt de na sëra de referać cun discusciun tla biblioteca provinziala Teßmann a Balsan. La sëra ai 30 de mà fej pert dla linia de referać dal titul “Texturen”.
Wolfram Henning tëgn n referat dal titul „Bibliotheksbau heute - Umbruch und Tradition". Tl tëmp dles tecnologies d'informaziun modernes y di media nüs ne n'é i frabicać dles biblioteches nia jüs dojö. Ai à ciafè n carater dopl: „Deperpo che la pert interna é conzepida sciöche na contrada de dać che va tres inant, devënta le frabicat instës n simbol iconich pormez ala cité" (Anna Klingmann). Ejëmpli de imajes a livel internazional mostra vijiuns y conzeć d'atualité de biblioteches che se respidlëia cun plü o manco tlerëza tl'architetöra y tl aredamënt. Y sambëgn esìstel catalogs de criters por che na costruziun de na biblioteca garetes: 10 punć y na faziun "wow"! Wolfram Henning é professur emerité dla Hochschule der Medien, Stuttgart.
Christoph Mayr Fingerle, architët da Balsan, baia de „Eine Lese- und Lernlandschaft für Bozen". Le zënter dles biblioteches da Balsan é ponsè sciöche n post de comunicaziun. Chilò s'incunta porsones y media de vigni sort. Chilò van sot tl monn dla letöra y dl aprendimënt. Le lingaz dl'architetöra inviëia da se lascè jì y da jì ala slondra: da curts internes da na gran lerch a cabines da imparè individuales, da terasses de letöra davertes a atmosferes da imparè conzentrades. Laprò trasmët i trus l'imaja dla contrada de letöra y d'aprendimënt. Le vijitadù ti va pormez al frabicat tres passaji, sön les alzades él trus por s'orientè sciöche te n parch. Le referat ilustrëia chësc conzet cun tröp material iconografich.
I referać vëgn tignis en jöbia, ai 30 de mà tla Biblioteca Provinziala Teßmann (str. A.-Diaz 8) a Balsan dales 20.00. Do i dui referać gnaràl fat na discusciun cun la moderaziun de Johannes Andresen, diretur dla Biblioteca provinziala.
usp
Galaria dales fotografies
