Atualità
Guviern, RAI y Provinzia à prejentà la cunvenzion per la RAI de Bulsan
Na cunvenzion inuvativa che mët n drova l federalism nce tl ciamp dla radiotelevijion y che gëura la streda ala Val d’Aosta y al Friul: nsci iel (NCUEI) ai 16 de mei unì prejentà a Roma la cunvenzion nueva Stat-RAI-Provinzia de Bulsan per la trasmiscions televijives y radio tla rujeneda tudëscia y ladina. Chësc var storich, dantaprima per la mendranza ladina, ie unì prejentà dal sotsecreter dla Presidënza dl Cunsëi di Ministri Giovanni Legnini, dal presidënt dla Provinzia Luis Durnwalder, dal assessëur Florian Mussner y dal diretëur generel dal RAI Luigi Gubitosi.
Da pert dla Presidënza dl Cunsëi di Ministri, dla Provinzia de Bulsan y dla RAI iel unì sotscrì na cunvenzion per i ani 2013-2015 per fé y mandé ora programs radio y de televijion tla rujeneda tudëscia y ladina tl Südtirol. Chësta acurdanza ie unida prejenteda ufizialmënter a Roma tla sënta storica dla RAI, tla streda Mazzini.
Aldò dla cunvenzion nueva vëniel da una pert aumentà la trasmiscions tudësces y ladines, dal'autra pert sëurantol la Provinzia de Bulsan l custimënt che nchinamò ie unì paià dal Stat. La Provinzia segurea per i proscimi trëi ani n finanziamënt de 20 milion de euro al ann, metan a chësta maniera n drova tant che fova unì fat ora n cont de federalism fischel tl'Acurdanza de Milan. "L cajo dl Südtirol ie n proiet inuvatif, che gëura la streda per mëter a jì da nuef nce d'autra cunvenzions RAI per la mendranzes tla Val d'Aosta y tl Friul" à sorissà l sot secreter cun delega per l'editoria Giovanni Legnini.
L presidënt Durnwalder à auzà ora che la cunvenzion "ie na prova cuncreta de co che n possa mëter n droa l federalism" y che "l aumënt de lerch per radio y televijion per la mendranzes, juda a rafurzé si identità culturela, a valorisé la rujeneda y la tradizions". Per chësc resultat storich à Durnwalder rengrazià duc chëi che ntan i ultimi doi ani se à dat da fé te ancuntedes y tratatives per ruvé ala sotscrizion dla cunvenzion nueva.
La cunvenzion nueva ti va a bën de duta la programazion de Bulsan, ajache la vëija dant nvestizions de miuramënt tecnich ala strutures y ai aparac. La mendranza ladina ie te chësc mumënt mpurtant unida reprejenteda dal assessëur ladin Florian Mussner cumpanià dal parlamenter Daniel Alfreider. "Cun arjontes sciche chësta acurdanza ne vën la rujeneda ladina nia me cureda, ma la giapa nce plu daunì" à dit Mussner.
De pëis ie nce stat l ntervënt dl diretëur generel dla RAI Gubitosi che à lecurdà l nteres dla RAI per i bujëns dla mendranzes: "chësta cunvenzion dëssa judé a arjonjer mo de plu". N cont dla sënta de produzion a Bulsan al dit che cun i finanziamënc segures per trëi ani da pert dla Provinzia, puderal te chësta sënta unì fat de majera nvestizions tecnologiches. Bulsan sarà la prima sënta regiunela che lëura defin ti formac digitei y deventerà a chësta maniera un di zëntri plu mpurtanc y al var tecnologich di tëmps. (USP)
as
