Atualità
Stieres tla scolines ladines vën sëurandates ai 18 de juni
N merdi ai 18 de juni uniral sëurandat de ndut 27 stieres tla scolines ladines per l proscimo ann de scola. Maestres che ie tla graduatories per trasferimënc y per ncëries a tëmp determinà ie nviedes tla direzion dla scolines a Piculin.
La majera pert dla stieres per l personal pedagogich dla scolines che vën dates ora per l ann 2013-14 reverda la maestres. L se trata plu avisa de 11 stieres a tëmp plën y 6 a tëmp parzial. Doi stieres a tëmp parzial ie nce ududes dant per maestres de ntegrazion. Per culaburadësses pedagogiches iel per n auter ann a desposizion 4 stieres a tëmp plën y 4 a tëmp parzial. La stieres vën sëurandates per trasferimënt o aldò dla graduatories provinzieles.
La sëurandata unirà fata n merdi ai 18 de juni tla direzion dla scolines ladines a Piculin. Dala 9 da duman uniral sëurandat la stieres per la maestres y dala 10 chëles per la culaburadësses pedagogiches. (USP)
as
