Atualità
Punt da Pruca é sëgn davert
OSP - Inier él gnü davert ofizialmënter, cun na picera festa, le punt nü realisé a Pruca. Le punt nü, che fej da passaje sön l'Isarch por le trafich y la ferata, á costè 1,445 miliuns d'Euro y é gnü realisé te feter dui agn de laûr.
Le punt é de gran importanza por la viabilité ite y fora por Gherdëina y ó dandadüt garantí na maiú defluënza y smendrimënt dl trafich, spezialmënter intratan les sajuns altes por le turism. Söl post él rové inier adalerch l'assessur ai laûrs publics Florian Mussner adüm al ombôlt de Pruca Norbert Merler y ai tecnics provinziai.L'assessur Mussner s'á naota congratulè cun i tecnics y i lauranti ch'á realisé chëst opera.
"Le punt nü porta a na soluziun dl gran problem dl trafich, nia ma por i abitanc dl pice zënter de Pruca, mo ince por i abitanc di paîsc dlungia", á dit l'assessur Mussner.
Le punt nü mosüra na lunghëza de 101 metri, é lerch 11, 60 metri y soporta en pëis de 400 tonelades.
Chësta opera é ma le prüm vare por le gran proiet de zirconvalaziun dl trafich preodü te chësc post. Le proiet prevëiga ince la costruziun de en viadut por colié la strada provinziala por Ciastel, en tunel por incanalè le gran trafich che jará ite y fora por Gherdëina y deplö mosüres por smendrí le incuinamënt acustich te chësta zona. "Le gran laûr sará ruvé te en diesc agn", á dit le assessur Florian Mussner che á ince recordè che le proiet costará ala aministraziun la zifra de 11, 887 miliuns de Euro por la realisziun dles atres operes bele scumenciades.
EB
