Atualità
Plata de nfurmazion sun la veles provinzieles ie online
Ai 27 de utober uniral lità l Cunsëi provinziel nuef. Co che l unirà lità, chi che puderà unì lità, ciunes che ie la dates per i partic y duta l’autra nfurmazions n cont dla veles ie śën da giapé tl internet sun la plata http://lites.provinzia.bz.it I cuntenuc ie unic anjeniei tla trëi rujenedes provinzieles. Sëuraprò ala plates web, vëniel chëst iede per l prim iede nce dat nfurmazion tres twitter y facebook.
Per duc i litadëures, per i partic, i candidac y nce per i chemuns ie unì anjenià n portal internet cun la nfurmazions n cont dla veles provinzieles da d’autonn. La plates
http://lites.provinzia.bz.it ie unides anjeniedes dala Direzion generela dla Provinzia y ie fates sun tla forma de “One-Page”. Te chësta maniera de fé plates web vën duta la nfurmazions prejentedes sun una na plata. Nscì iel drët scëmpl adurvé la plata zënza mussei se cliché tres de plu sot-plates. Per ruvé ala nfurmazion che n chier.
La plata de prejentazion dla veles ie partida te cin capituli che dà n urientamënt de basa: nfurmazion sun la veles nstësses, nfurmazion per chiche cumpëida la stimes y i presidënc dla sëntes de vela cun leprò nce nfurmazion per candidac y la listes. Sëuraprò ruven nce pra duta la normes de dërt y te na sezion a pert ie unides anjeniedes duta la nfurmazions per i chemuns.
Tla pert danora dl portal iel na udleda de duta la dates de referimënt nchin ala veles dl 27 de utober.
Per l prim iede sënta la Provinzia nce sun i canai de nfurmazion social media facebook y twitter. La nutizies unirà do y do publichedes sun i social media y sun la plates internet.
Prejentazion dla veles provinzieles
http://lites.provinzia.bz.it
www.facebook.com/landtagswahlen.2013.elezioniprovinciali
twitter.com/stwahl13
Sun twitter uniral adurvà l hashtag #st13.
as
