Atualità
Ai 23 d’agost deura “Na vita por l’ert” tl Istitut Ladin
En vëndres, ai 23 d’agost jaràl inant la linia de mostres artistiches da d’isté tl Istitut Ladin Micurà de Rü cun la daurida dla mostra “Na vita por l’ert”. Te chësta cuarta esposiziun dla linia de mostres a San Martin de Tor saràl da odëi creaziuns artistiches de Lois Irsara.
"Na vita por l'ert" é n titul che po ester n ressümé de döta la creaziun artistica de Lois Irsara, iüst chësc ann che l'artist complesc 90 agn. "Na vita por l'ert" mostra inće la varieté de sües operes. L'artist ciafa ispiraziun por sü motifs tla vita, tla natöra, tla porsona y chir tres indô la belёza tla scemplité y tl lingaz dl chît. Lois Irsara, che é un di pröms mёmbri dl "Südtiroler Künstlerbund" y dl'Epl, mostra te chёsta esposiziun contrades, ciüfs, retrać y natöres mortes fora de döta süa ativité artistica, che va dai agn de stüde a Milan ćina ales ultimes operes fates da püch.
Pro la daurida, en vëndres ai 23 d'agost dales 18.00 tl Istitut Ladin a San Martin, gnaràl inće presentè le liber "Dessёgns Chedri - Advёnt Nadè Cripeles", olache al é gnü publiché pitöres, dessёgns y chertes da Nadè de Irsara.
L'Istitut Ladin Micurà de Rü, l'EPL (Ert por i Ladins) y la Lia Mostra d'ert, organisadus dla linia de mostres da d'isté, à odü danfora cater mostres a San Martin y por le pröm iade inće öna na mostra a Urtijëi. A chësta manira vëgnel portè pro a miorè le contat danter les döes valades tl ćiamp artistich.
Do les mostres "Teramënter" de Irina Tavella, "Nubi" de Giancarlo Lamonaca y "Por le momënt nia da abiné" de Fabian Feichter é la mostra de Lois Irsara l'ultima tla sënta dl Istitut Ladin a San Martin. Tl salf dla Lia Mostra d'ert a Urtijëi saràl dai 13 de setëmber inant da odëi la mostra "Uncutted" de Barbara Tavella.
Ala mostra tl Istitut Ladin a San Martin podaràn jì a ti ćiarè dal lönesc ala sabeda dales 10.00 ales 12.00 y dales 16.00 ales 19.00 y la domënia dales 10.00 ales 12.00. La mostra "Na vita por l'ert" sarà da odëi ćina ai 2 de setëmber. (USP)
as
