Atualità
Miuramënt sun la streda de Jëuf de Sela
Ntan chisc dis de sajon auta à l muvimënt sun i jëufs pudù passé plu segur per furné sun Jëuf de Sela: daujin ala cava, danter Plan de Gralba y l jëuf, an pudù passé sun n puent che ie unì fat da nuef y che garantësc dantaldut ai mesuns pesoc plu segurëza. L puent nuef ie per l assessëur Mussner na bela arjonta ajache l stluj ju i majeri lëures udui dant per chësta legislatura sun i jëufs.
L puent nuef sun la streda dl Jëuf de Sela ie bele l segondo che ie unì fat da nuef tl raion dla cava. Aldò de analises de segurëza che fova unides fates a duc i puenc tl Sudtirol, ti fovel unì dat priorità a chësta grupa de puenc. Chësc segondo puent che ie unì fat da nuef mesura 10 metri de lunghëza y 7 metri de larghëza.
La Provinzia à ressanà chësc puent cun na nvestizion de 397.000 euro. "Fajon chisc lëures de ressanamënt, sciche l puent sun jëuf de Sela, per garantì la puscibltà de passé i jëufs" spiega l assessëur Florian Mussner. La puscibltà de furné da na valeda al'autra ie nce de valor per la mendranza ladina: "on de bujën de cuntat danter i ladins per mantenì l sentimënt de identità" nscì l assessëur ladin.
La ncëria de fé i lëures de ressanamënt dl puent ti ie jita ala firma Goller Erben de Sëuc che ova venciù l cuncors. Tl Assessorat ai lëures publics ti vëniel dat gran mpurtanza ala puscibltà de passé l jëuf, nscì iel ntan i lëures unì fat n pitl toch de streda provisoria per pudëi passé da uni ëura. Ai prims de setëmber uniral mo metù ju l asfalt fin.
L puent n cuestion ie pra l chilometer 26,8. N auter puent che ie me 200 metri dessëura, fova unì fat da nuef dan doi ani y tl Assessorat ai lëures publics iesen bele tl lëur de fé la proietazion per n terzo puent te chësc raion. (USP)
as
