Atualità
Jonta provinziela: dac dla sanità, Bletterbach, biogas y cëses per studënc
I spediei dl Sudtirol dëssa pudëi se giamië i dac che reverda la Sanità. La Jonta provinziela à (NCUEI) ai 26 de agost nciarià la sozietà Südtirioler Informatik AG de svilupé n sistem de nfurmazion per chësc bujën. Tla senteda plu curta dl solit, iel nce unì tëut la dezijion de ngrandì l zënter vijitadëures dl Geoparc Bletterbach y de seguré la funzion de cëses per studënc.
Ncëira per n sistem de nfurmazion tla Sanità
L barat de dac che reverda la sanità danter i set spediei dl Sudtirol dëssa unì sëmplificà. "Ncuei ons nciarià la sozietà Südtiroler Informatik AG de svilupé n sistem de nfurmazion acioche i spediei posse se giamië i dac de sanità zënza dificulteies" nsci l presidënt Luis Durnwalder do la senteda scurteda per via de na vijita al cunzern Swarovski tl Tirol. L presidënt dla Provinzia à sorissà che l sistem de nfurmazion per la Sanità (SIS) muessa ti vester a bujëns particuleres: "L nes stà a cuer che nosc sistem de Sanità sibe nce al var di tëmps n cont de giamië dac, scebën che l ie da mëter a verda ala defendura di dac y l cuntrol de chi che ti ruva permez, ajache l ie pu dac sensibles" à dit Durnwalder.
L zënter vijitadëures Bletterbach vën ngrandì
I assessëures provinziei ie stai a una che l zënter vijitadëures tl Geoparc Bletterbach a Aldein vënie ngrandì. L zënter ne ti ie nia plu a si suzes: davia che l ie n grandiscimo nteres a udëi l sfundron Bletterbach, recunesciù sciche arpejon mundiela Dolomites, ne iel nia plu lerch assé. "La strutura fova unida fata per 15.000 vijitadëures al ann, ma ntant ruvel adalerch 60.000 nteressei al ann y nchin a 800 persones al di" nsci l presidënt Durnwalder do la prima senteda do la pausa da instà. L zënter che fova unì giaurì dl 2005 dëssa unì adatà ai bujëns atuei cun n ngrandimënt de feter 600 metri cuadrac. L custimënt dat pro ie de feter doi milion de euro. I vijitadëures dëssa n iede giapé na sëuravijion dl sfundron ulache n possa mparé a cunëscer la storia dla tiera. L zënter ngrandì dëssa pona nce pité lerch a na mostra sun l'arpejon mundiela Dolomites-Unesco. "La Bletterbachschlucht ie na sensazion mundiela, perchël ulons nce che la giate n zënter vijitadëures dëni de i mpurtanza" nsci Durnwalder.
Criteries nueves per mplanc biogas
Per giapé cuntribuc a fé o ngrandì mplanc a biogas, à la Jonta provinziela dat pro regules nueves. "Tl cheder de nosta strategia per l tlima dajons n sustëni a duta la sortes de energia alternativa, scebën che i mplanc biogas à mo n vantaje sëuraprò che n possa nuzé lamboscia respetan l ambient y zënza che la tofa" nsci l presidënt dla Provinzia Durnwalder. Aldò dla ndicazions europeics, vën i mplanc biogas nce tl Sudtirol sustenii dala man publica. Chësc vën fat cun n finanziamënt che ruva pra de pitla firmes nchin al 80 percënt.
Seguré la funzion de cëses per studënc
La funzion dla cëses per studënc dëssa unì segureda tres l liber fundier. La Jonta provinziela à tëut chësta dezijion ajache ti ani passei iel unì frabicà o ressanà de plu cëses per studënc y aldò de Durnwalder, iel de bujën de seguré si funzion acioche i scioldi publics che fova unic spendui ite porte nce la funzion per n tëmp plu lonch. "La cëses per studënc dëssa unì purtedes ite tl liber fundier te chësta si funzion per 25 ani" nsci Durnwalder.
as
