Atualità
La comisciun dles lîtes é gnüda metüda sö: lîta por corespondënza y dërt de lîta passif
Ai 12 de setëmber él gnü istituì la comisciun dles lîtes cun l’inćiaria da controlè che les lîtes provinziales di 27 d’otober vëgnes tignides regolarmënter. Bele pro süa pröma sentada s’àra dè jö da öna na pert cun les condiziuns por eserzité le dërt de lîta passif y dal’atra cun le dërt de lîta por corespondënza.
La comisciun é metüda adöm da trëi vicari: le presidënt Peter Michaeler (tribunal aministratif), Josef Hermann Rössler (curt di cunć) y Werner Mussner (tribunal provinzial). Ai à l'inćiaria da controlè che i laûrs litai vëgnes tignis sciöche al alda y da dè respostes a chestiuns püch tleres che à debojëgn de n'interpretaziun. Bele pro la sentada costitutiva s'à la comisciun dè jö cun dui punć sön l'ordinn dl dé: le dërt de lîta passif y la lîta por corespondënza (dërt de lîta atif).
La posciblité da lité por corespondënza (dërt de lîta atif) à les litadësses/i litadus südtirolesc che à la residënza foradecà y inće che che vir temporaneamënter defora dla provinzia. Ćina ai 27 de setëmber pol gnì dè jö la domanda aposta tl comun de residënza; naôta presentada ne po chësta nia plü gnì trata derevers. Tla domanda mëssel gnì dè dant la misciun defora dl Südtirol olache al é da ortié la documentaziun che va debojëgn por podëi lité y che mëss spo gnì piada do personalmënter da che che à fat domanda te comun. Ara ne va nia da menè le material lital a na misciun tl raiun provinzial.
Les litadësses/i litadus che lîta por corespondënza mëss ćiarè che süa zetola litala röies por posta ćina alplü tert ai 25 d'otober pro l'ofize lital da Balsan. Al ne vel nia la data sön le timber dla posta, mo ma chëra de canche la lëtra röia efetivamënter tl ofize a Balsan.
La chestiun che reverda le dërt de lîta passif, chël ô dì le dërt da gnì lità, â da nen fà cun le momënt da canche al mëss ester les condiziuns legales preodüdes. La comisciun dles lîtes à fat fora che al po ma se candidé che che ademplësc ai 12 de setëmber dötes les condiziuns damanades por se scrì ite ti registri litai.
Implü à la comisciun de lîta confermè che les porsones autorisades da zertifiché les firmes por la presentaziun dles listes mëss ademplì les condiziuns preodüdes dal art. 18 dla lege regionala che alda laprò. De chësta categoria fêjel pert secretêrs/secretêries de comun, funzionars/funzionares de canzlaria y notars/notaries. (USP)
usp
