Atualità
Permafrost/Lech dl Dragon: desdì l’escurscion de n sada
La dlacia dl permafrost y si cunseguënzes sun l’eghes tl ejëmpl dl Lech dl Dragon sun Mëisules ie l argumënt zentrel de na sëira de film, n vënderdi ai 20 de setëmber te Sëlva. L escurscion al Lech dl Dragon ududa dant per la sada ai 21 à messù unì desdida.
"L'ega da bever dla populazion de Sëlva vën garantida dala dlacia dl Lech dl Dragon": sce la ie veramënter nscila, puderan nrescì pra na sëira de film, referat y descuscion te Sëlva. N vënderdi ai 20 de setëmber uniral mustrà per l prim iede n film che ie unì fat n ucajion dl proiet "Permaqua". L sarà da udëi i resultac de studi tl Sudtirol y Tirol dl nord n cont de resserves d'ega dlacedes ite ti raions da mont. Te chësc proiet che ova scumencià dl 2011 iel nce unì analisà la situazion dl Lech dl Dragon. La sëira tla Cësa de Cultura de Sëlva, cun scumenciamënt dala 20.00, unirà giaurida cun na ntroduzion dl ambolt Peter Mussner. Do l film tenirà l geologh provinziel Volkmar Mair n referat sun l permafrost y l proiet "Permaqua". L publich puderà rujené pea te na descuscion cun i reladëures y l regisseur dl film Dennis Timm cun si cameraman Helmut Lechthaler.
Per sada ai 21 de setëmber fovel prugramà n'escurscion al Lech dl Dragon, che à messù unì desdida per via dla nëif. Jì a pe su per la val Setus ie a chësta maniera massa periculëus y nscì ie l'escurscion deberieda cun i geologs unida spënta al proscimo instà.
De plu nfurmazion sun l proiet ie nce da giapé tres internet sun www.permaqua.eu. (USP)
as
