Atualità
Cooperaziun al svilup, TIS, Eurac, Autostrada dl Prener
USP - Chëstes é stades les tematiches plü importantes tratades dal Govern provinzial incö a Balsan - Danter l´ater él gnü definì inće la formaziun suplementara dl personal tl setur dl’ alimentaziun
Le Govern provinzial à aprovè incö le bilanz anual por la cooperaziun al svilup por le 2014. "La cooperaziun al svilup aprovada incö prevëiga la realisaziun de proieć dla Provinzia te paîsc en via de svilup dandaldöt adöm cun organisaziuns che à la sënta prinzipala tl Südtirol. Le contribut dla Provinzia por la realisaziun de chisc proieć sarà de indöt 1,8 miliuns de euro", dij Arno Kompatscher, Presidënt dla Provinzia.
Inće confermè él gnü incö i programs dl "TIS innovation park", Zënter por le svilup technich y por l´inovaziun, y dl´istitut d´arichida "Eurac - Europäische Akademie" da Balsan. Le program dl "TIS" é gnü aprovè por un en ann, por l´"Eurac" por i proscimi cater agn. "Nosta intenziun por le dagnì va inće tla direziun de na maiù colaboraziun inanter l´Eurac y l´Universitè de Balsan", spliga Kompatscher.
Öna dles tematiches che é inće stades al´ordinn dl dé é le concurs por la gestiun dl'autostrada dl Prener, che gnarà scrit fora dales istituziuns competëntes statales proscimamënter. Le Govern provinzial à chilò tut posiziun por ći che reverda la manira de gestiun dla autostrada. "Nosta intenziun é chëra de sconè la sanité dles porsones y por limité le desturb acustich fajunse chëstes propostes: l´introduziun de deplü parëis cuntra la vera, n asfalt spezial cuntra la vera, l´introduziun de limits de velozité plü rigorusc y l´alzamënt dles tarifes dl'autostrada spezialmënter por veicui che incuinëia deplü", spliga Kompatscher. La tuta de posiziun dla Provinzia de Balsan messarà gnì menada le plü tert ai 19 de mà a Roma.
Na dezijiun che le Govern provinzial à inće tut incö é da tì dè na gran autonomia al´economia privata tl setur dl' alimetaziun por ći che reverda la formaziun suplementara dl personal preodüda da chësc ann inant da n regolamënt dl´Uniun Europeica (EU). "Les conoscënzes di lauranć tl setur dl' alimentaziun mëss ester tres atuales y al é le dovëi dles dites y aziëndes da formè sò personal", spliga l´assessuria Martha Stocker che dij inće che chësc ann sarà de proa por odëi sce chësta atuaziun dl regolamënt EU funzionëia o sce al é nezesciar avëi na legislaziun provinziala plü rigorosa.
Inultima à le Govern provinzial inće aprovè incö en pest de 6.000 euro por aziëndes y dites privates che desmostra de avëi na buna integraziun de persones cun n handicap tl monn dl laûr.rc
