Atualità
Mitans y mituns dla scolina impara da conësce le monn dla laûrs tl Museum Ladin
USP - Le Museum Ladin dla laûrs Ursus ladinicus da San Ćiascian à metü a jì adöm ales scolines ladines en proiet didatich por portè le monn dla laûrs plü daimprò ai mituns y les mitans dles scolines. Tratan chësta scomenciadia, che é culminada incö ai 15 de mà cun na rapresentaziun teatrala, à i mituns y les mitans inće podü chirì fora en inom nü por la laûrs rossa M12, che an à ćiafè do en inzidënt stradal tl 2012.
Cun la rapresentaziun teatrala "Iö oress na laûrs, che à inom..." él gnü stlüt jö incö le proiet didatich metü a jì dal Museum Ladin y che à albü na partezipaziun ampla de indöt 250 mituns y mitans dles scolines dla Val Badia, dla Val Gherdëna, de Cortina d´Ampëz y de Fodom. Le proiet è gnü coordiné dal Museum Ladin dla laûrs Ursus Ladinicus adöm al raiun dles scolines dles valades ladines.
L´assessur ala scora ladina y ai museums Florian Mussner lalda chësta scomenciadia che coliëia l´educaziun al devertimënt: "Por l´educaziun di mituns y dles mitans él important che l´interès por la cultura y por la sciënza vëgn coltivé bele da pici y da piceres insö y che ai assoziëiess les vijites ti museums inće con devertimënt".
Tratan le proiet à i mituns y les mitans vijité le Museum dla laûrs por imparè a conësce le svilup dles creatöres y di animals dala preistoria ćina ai tëmps moderns. Insciö él inće gnü fat n confrunt tra la laûrs Ursus Ladinicus y la laurs rossa M12 ćiafada tl 2012. I mituns y les mitans à inće podü se ponsé fora en inom nü por la laurs M12 y adöm ala iuria él gnü chiri forà ala fin l´inom MICO.
I dessëgns che i mituns y les mitans à fat tratan le proiet è da odëi ćina ai 18 de mà te na mostra ala ciasa dles uniuns J.B.Rinna a San Ćiascian. Por chësta domënia, ai 18 de mà y Dé Internazional di Museums, vegnël inće mostrè le teater "Iö oress na laûrs, che à inom..." tl salf dles uniuns a San Ćiascian adöm cun Gernot Nagelschmied y Giulia Vaccari (chësta rapresentaziun teatrala é ponsada por pici y gragn). En chësc dé él l´entrada al Museum Ladin gratis.
Informaziuns: Museum Ladin Ćiastel de Tor, strada Tor 65, San Martin de Tor, tel. 0474 524020.
rc
