Atualità
La Comisciun Provinziala por l’avalianza à definì les tematiches y formè i grups de laûr
USP - La Comisciun Provinziala por l’avalianza dles oportunitês à albü da püch süa sentada generala, olache àl é gnü definì les tematiches por i proscimi agn. Implü él inće gnü formè tratan la sentada deplü grups de laûr por deplü seturs spezifichs. „Por ći che reverda la parité dles oportunitês messun ćiare da miorè la colaboraziun danter les istituziuns dla provinzia, sciöche por ejëmpl danter le sorvisc por les ëres, l´aconsiadëssa por l’avalianza dles oportunitês y atres organisaziuns dla provinzia mo inće da foradecà“, dij l´assessuria Martha Stocker.
Por realisé l'avalianza dles oportunitês danter ëra y ël à les rapresentantes dla Comisciun Provinzia por l'avalianza dles oportunitês laorè fora n program spezifich cun deplü tematiches y prioritês, inće sön la basa di resultać che é gnüs fora tratan la incuntada „Mehr Frauen - Mehr Demokratie" („Deplü ëres - deplü democrazia") de 110 ëres tl altonn dl 2013.
Les tematiches por i proscimi agn é insciö danter ater: deplü incuntades culturales cun ëres de atres regiuns y cultures, la reduziun dles generalisaziuns scemplificades di sesc tla picera eté, la mioraziun dla rapresentaziun dles ëres ti massmedia y tla publizité, la presënza garantida dles ëres, la creaziun de n codesc de rapresentaziun mediatica, le combatimënt dla violënza cuntra les ëres y l'avalianza dles oportunitês tl sport. Al é inće gnü debatü por ći che reverda l'introduziun de na tematica desvalia por vigni mëis.
Tratan la sentada él inće gnü formè deplü grups de laûr. Le grup de laûr „L'ëra y la politica" gnarà condüt da Rastner Anna, le grup de laûr „L'ëra y la violënza - l'ëra y la sanité y le sport" da Helga Innerhofer", le grup de laûr „L'ëra y le laûr - Compatibilité familia y laûr" da Margareth Fink, le grup de laûr „L'ëra y les tematiches culturals, soziales y educatives" da Laura Senesi, le grup de laûr „L'ëra y i media" da Evelyn Gruber y le grup de laûr „Premies por laûrs scientifics che reverda la situaziun dl'ëra tla sozieté o l'avalianza " da Judith Gögele.
La presidënta Ulrike Oberhammer é contënta dla buna colaboraziun bele tratan la sentada generala. „Sön la basa dles propostes dles ëres de döt Südtirol sunse stades bunes da mët sö les tematiches por i proscimi agn y les representantes à desmostrè na gran vëia da laorè por arjunjé plü avalianza dles oportunitês te Südtirol", insciö Oberhammer.
rc
