Atualità
Kompatscher sön les lîtes por l’EU: „Ne lasciun nia tó ai atri les dezijiuns sön nosc dagnì“
USP - Chësta domënia, ai 25 de mà dl 2014, é düć i litadus y dötes les litadësses dl Südtirol cherdà da jì a lité le Parlamënt nü dla Uniun Europeica. Le Presidënt dla Junta provinziala, Arno Kompatscher, fej n apel da jì a dè jö la usc pro chësta lîta importanta, inće deache: „Chi che ne va nia a lité, chi ti lascia tó ai atri les dezijiuns sön nosc dagnì.“
Por le Presidënt dla Junta él tler che le proiet de n'Europa unida à assiguré la pêsc tl tëmp y che l'unité é inće fondamentala por le dagnì: „L'Uniun Europeica é le proiet por la pêsc plü gran dl monn, mo i ne podun nia ma l'odëi te süa funziun sciöche garanta de na convivënza pazifica." Plütosc é l´EU devëntada cun le tëmp na istituziun olache al vëgn tut la maiù pert de dötes les dezijiuns politiches: „Al vëgn aratè che l'80 porcënt de dötes les dezijiuns che a da fà cun nosta sozietè y cun nosta vita vëgn tutes en colaboraziun cun Bruxelles", dij Kompatscher.
Inće pro chëstes rajiuns à les litês por le Parlamënt nü dla EU di 25 de mà na importanza fondamentala. „Düć i litadus y dötes les litadësses dess porchël jì a litè", insciö Kompatscher. Deach podëi jì a lité n'é nia ma n dërt democratich, mo la lîta é inće por vignun y vignöna na responsabilité politica: „Chi che ne va nia a lité ti lascia tó a valgügn d'atri les dezijiuns por le dagnì de nos düć", spliga le Presidënt dla Junta provinziala.
rc
