Atualità
Sorvisc Strades: Ma tl 2013 él gnü inćiarié indöt 70 firmes dl post
La detlaraziun, che le Sorvisc Strades dla Provinzia ti fajess concorënza ales dites dl post, ne lascia l'assessur Florian Mussner nia avarëi: "Feter döt le budget dl Sorvisc Strades va a bëgn dl'economia locala; ma por la manutenziun straordinara él gnü inćiarié indöt 70 firmes dl post", recorda Mussner. Le valur de chëstes inćiaries é de feter 12,2 miliuns de euro.
„Le Sorvisc Strades provinzial ne ti fej dessigü degöna concorënza ales dites dl post, al contrar, al é un di plü gragn daturs de laûr", dij l'assessur y sotlignëia che: "dl 2013 à le Sorvisc Strades albü indöt n budget de 41,5 miliuns de euro y che feter le mez vëgn adorè por la manutenziun straordinara dles strades" y chësta vëgn realisada por la majera pert tres dites dl post: "L'ann passè unse realisé passa 70 proieć, y plü avisa - cun na sóra ezeziun - dötes cun l'aiüt de dites dl post", dij l'assessur provinzial. Chisc proieć tol ite 12,2 miliuns de euro y ćiamò rodunt sis miliuns de euro por sorvisc y fornidöres da pert de aziëndes privates: "Pro chisc toca tlandri de strada, sis o pà de lëgn che va debojëgn por desparè la nëi", spliga l'assessur provinzial.
Inće la manutenziun ordinara dla rëi de strades vëgn realisada da firmes dl post. Di rodunt 20 miliuns de euro, che vëgn spenü te chësc ćiamp, é n chert odü danfora por la surandada de sorvisc: "I imprestun por ejëmpl auti dales firmes de costruziun o les inćiariun da scoè o romenè sö i tunì", dij Mussner. Spo röiel ćiamò laprò les spëises por cumprè saurun y sè y inće na linia de de pici laûrs surandà diretamënter: "Chisc va düć a firmes dl post", dij l'assessur provinzial.
Mussner sotrissëia inće che bele l'edema che vëgn gnaràl realisé les prömes mosöres dl program spezial dla junta provinziala por tó y jì i dagns dl invern. "Por le fà unse preodü n valgügn mesi, che ne ti öga nia ma a che che va cun l'auto, mo inće al'economia dl post", insciö l'assessur provinzial.
USP
