Atualità
Modamënć pro le proporz linguistich y laûrs pro la infrastrotöra sanitara
USP - La Junta dla Provinzia da Balsan à aprovè incö danter l’ater l’aplicaziun unitara dl proporz linguistich por i laûrs de direziun tl setur sozio-sanitar, le program cuincuenar por la manutenziun straordinara y por i laûrs d’adatamënt dla infrastrotöra sozio-sanitara provinziala y l’aumënt dl’oferta por i sorvisc d’assistënza tratan le domisdé y l’isté 2014 por i mituns.
La Junta provinziala à aprovè incö l'aplicaziun de n proporz linguistich unitar te döt le raiun dl Südtirol por ći che reverda i posć de laûr de direziun tl setur sozio-sanitar. „Ćina sëgn êl vigni raiun sanitar che assegnâ i posć de laûr, por ejëmp di primars, do na regolamentaziun locala dl proporz che tignî cunt dla presënza locala di grups linguistics, cun chësta mudaziun da incö vëgnel unifiché le proporz por döt le Südtirol", spliga le Presidënt dla Junta Arno Kompatscher. Preodü él che la presënza de n grup linguistich ne po nia jì sura le 25 porcënt dl valûr ofizial y che na desviaziun dal proporz mëss gnì motivada da pert dl raiun sanitar ala Junta provinziala, insciö Kompatscher che sotlignëia, che cun chësta mudaziun él poscibl da avëi plü flessibilité pro l'assegnaziun di posć, inće en conscidraziun che nia düć i posć de laûr ti raiuns sanitars é ocupà.
Implü à la Junta inće aprovè incö le program cuincuenar por la manutenziun straordinara y por i laûrs d'adatamënt dla infrastrotöra sozio-sanitara dla Provinzia. "Por podëi jì inant cun i laûrs scrić fora diretamënter dai raiuns sanitars él gnü aprovè 18 miliuns de euro por la manutenziun straodinara por le 2014, y por vigni ann che à da gnì 14,4 miliuns ćina le 2018", insciö le Presidënt Kompatscher.
La Junta provinziala à inće amplié incö l'oferta por i sorvisc d'assistënza tratan le domisdé y l'isté por i mituns. La soma preodüda por les ativitês organisades tres le program por i sorvisc d'assistënza vëgn aumentada de 1,8 miliuns de euro, y passa insciö da 4 miliuns a indöt 5,8 miliuns de euro. "La gran domanda do l'oferta por i sorvisc d'assistënza por l'isté da pert de mituns, jogn y geniturs s'à portè a aumentè l'oferta y tl dagnì gnaràl inće preodü de plü incuntades por podëi adatè damì le program ales nezescitês dles families", spliga l'assessuria por la familia Waltraud Deeg. Gnü stabilì él incö dala Junta provinziala inće le numer de posć resservà ai jogn por le sorvisc de volontariat tratan l'isté. Indöt él 93 jogn danter i 15 y i 19 agn che po se registré al'ativité volontara y che sarà a desposiziun dles organisaziuns por indöt 30 ores al'edema tratan l'isté dl 2014 por n compëns de 80 euro al'edema. Inultima él inće gnü aprovè le concurs por la presentaziun de proieć tla cheder dl sorvisc zivil provinzial. La seleziun di proieć vëgn fata diretamënter dales organisaziuns d'ütl publich y po avëi na dorada mascima de indöt 30 mëisc.
rc
