Atualità
Dala Junta: Studié foradecà devënta plü scempl
USP – Tratan la sentada dla Junta provinziala da incö él inće gnü stabilì les integraziuns nezesciares por studënć dles scores altes che stüdia foradecà. Tematiches importantes é inće stades la colaboraziun sura-regionala dles Regiuns dla Euregio y le sostëgn finanziar ai studënć dles scores altes che alojëia dalunc dales families.
Le budget provinzial de sostëgn preodü por i studënć dles scores altes che alojëia dalunc dala familia por l'ann scolastich 2014/15 é de 7 miliuns de euro. L'assistënza finanziara dla Provinzia por vigni studënt dla scora alta che mëss vire dalunc dala familia por rajuns scolastiches é de 2.800 euro. "Indöt él gnü aprovè 2.340 domandes de studënć che fej fora indöt na spëisa de 7 miliuns de euro. Chësc sarà le ultimo concurs scrit fora do les modalitês preodüdes dala bandida atuala, dal proscimo ann inant gnaràl adorè la detlaraziun di bëgns y dl davagn, che adora n sistem de valutaziun unitar y che dëida inće smendrì l'iter burocratich", insciö Kompatscher.
Novitês é inće gnüdes anunziades incö por i studënć dles scores altes che tol la dezijiun da studié un n ann foradecà. "Por jì adincuntra ai studënć unse stabilì tres la proposta dl Consëi scolastich che n'integraziun por passè al proscimo ann é ma preodüda te chisc dui caji: tl pröm caje sce les valutaziuns dla scora ospitanta é negatives o sce tl plann di stüdi dla scora ospitanta n'é les materies fondamentales y d'oblianza nia presëntes", spliga Arno Kompatscher.
N ater punt tratè tratan la sentada dla Junta da incö é stada la colaboraziun di ofizi tres le proiet dla Euregio. Por miorè i sorvisc por la popolaziun él preodü da aumentè la colaboraziun dles istituziuns dla Euregio. "Nosc obietif é chël da miorè la colaboraziun danter la EVTZ (Junta europeica por la colaboraziun teritoriala) y les istituziuns dles trëi Regiuns dl Südtirol, dl Tirol y dl Trentin sciöche inće cun l'ofize metü adöm dales Regiuns a Bruxelles", spliga Kompatscher che dij, che na colaboraziun plü ampla portass inće a na maiù conescënza dles funziuns y di sorvisc dles istituziuns sura-regionales por la popolaziun.
Ala fin dla conferënza stampa à le Presidënt Arno Kompatscher inće informè i media che indoman, mercui 4. de jügn dl 2014 sarà le Presidënt a Torino por presentè le raport dla Provinzia sön les condiziuns che la Provinzia a scrit dant por la conzesciun dl'autostrada dl Prener. " Les condiziuns dl raport é gnüdes laurades fora adöm ai Comuns interessà, sciöche inće ales rapresentanzes di raiuns interessà adöm ala Provinzia y gnarà portades dant indoman al organn de control statal dla mobilité, che é inćiarié da scrì fora la conzesciun", stlüj jö Kompatscher.
rc
