Atualità
Contribuć por i pendolars: Domandes ćina ai 29 de agost
USP - Da śëgn inant gnarà i contribuć por i pendolars paià fora do criters nüs stabilis dala junta provinziala: “L’obietif prinzipal dla mudaziun di criters é chël da sostegnì deplü les porsones che à efetivamënter n tru lunch y compliché por jì sön le post de laûr”, dij l’assessur por la mobilité Florian Mussner. Les domandes por contribuć po gnì fates ćina ai 29 de agost.
La domanda do n contribut por les spëises de iade por l'ann passè ti mëss gnì menada da śëgn inant tres internet al Ofize Trasport de porsones dla Provinzia. Por le pröm iade gnaràl adorè i criters nüs stabilis dala junta provinziala adöm cun i sindacać y les rapresentanzes di consumadus. "Cun i criters nüs orunse sostignì deplü les porsones che à efetivamënter n tru lunch y compliché por rové sön le post de laûr y che ne à nia la poscibilité da adorè le trasport publich", insciö Mussner.
La mudaziun di criters prevëiga insciö che ma plü pendolars che fej n iade por jì y gnì dal post de laûr che é plü lunch co 18 chilometri y chësc por almanco 120 dis al ann. Implü ne pol passè sön la trassa che porta al post de laûr degun meso dl trasport publich tl interval regolar de 30 menüć. Inultima él inće gnü fissé le tët de 50.000 Euro de davagn complessif brutto sciöche limit plü alt por avëi le dërt da ciafè n sostëgn finanziar tres i contribuć por i pendolars; sura 50.000 euro de davagn brutto anual ne ciafun degun sostëgn finanziar.
Por smendrì i tëmps de resposta da pert di ofizi competënć vëgnel da śëgn inant ma plü azetè domandes fates online. Por podëi fà na domanda online val debojëgn da avëi n account zertifiché por l'eGovernment o la Cherta di sorvisc y n aparat de letöra dla cherta (de plü informaziuns sön la Cherta di sorvisc pon ciafè cherdan sö le numer de telefonn 800 816 836 o sön la plata internet dla Cherta di sorvisc por todësch y por talian). Dötes les informaziuns y novitês sön i contribuć por i pendolars pon inće ciafè sön la plata dla Rëi zivica sot al punt "Sorvisc adorà le plü gonot" o inće pro l'Ofize Trasport de porsones (tel. 0471 415492 e-mail: PendlerBeiträge@provinz.bz.it).
L'assessur Mussner recorda ala fin che al vëgn porvè da recuperè I'intardiamënt di paiamënć di contribuć por i pendolars di ultimi agn: "Ćina la fin de chësc ann oréssun paié fora les domandes fates tl 2011 y por l'aisciöda dl 2015 ponsun da podëi paié fora inće dötes les domandes dl 2012".
rc
