Atualità
Orars dl trasport publich: Mudaziuns importantes
Cun la fin dl ann scolastich vëgnel inće ajornè i orars di mesi dl trasport publich. Por podëi ti jì adincuntra a na presënza plü ampla de passajiers sön les trates che porta a traverć de escurjiuns él gnü aumentè i mesi de trasport publich tratan les ores de aorela cörta y les fins dl’edema.
I orars y les trates nöies pon inće ciafè da sëgn inant sön la plata Internet http://www.suedtirolmobil.info/lad y dai 15 de jügn inant inće adoran l'app nöia SüdtirolToGo, da desćiarié debann por Android y IOS y tosc inće por Google Play. I libri cun i orars sarà a desposiziun plü dessigü da mez jügn inant.
Les mudaziuns plü importantes tles valades ladines
Les linies dles corieres sön les trades che porta a traverć de escurjiuns gnarà ampliades, insciö passa les corieres plü gonot tratan döt l'isté (intlusivamënter fins dl'edema y dis de festa) sön chëstes trates: la linia 350 che coliëia Balsan/Porsenù cun Gherdëna, la linia 460 dala Val Badia a Bornech, la linia 461.1 Al Plan Mareobus, la linia 461.3 da Al Plan ćina sön Ju de Furćia, la linia 462 da La Val a Lungiarü o ćina sön Börz, la linia 465 dal Jù de Falzares a Calfosch y la linia 465 da Calfosch ćina sön Jù de Valparola. La "linia 471 Jus dolomitics" sarà ativa cun le orar estif dal 15 de jügn y coliëia danter l'ater Runcadić/Urtijëi - Jù de Sela - Jù de Frara - Calfosch - Corvara - Reba - Cianacëi.
Atives sarà dal 15 de jügn inant inće la linia estiva 355 da Pufels ćina Urtijëi y la linia estiva 357 da Santa Cristina a Sëlva. La linia estiva 357 Sëlva - Santa Cristina gnarà ampliada tratan l'isté ćina Runcadić.
Atres mudaziuns
Balsan
Bele dal mëteman de jügn é les linies nöies 110 (Balsan-Branzoll) y 111 (Balsan-Leifers-Leifers zona industriala) piades ia. Insciö él poscibl da garantì che na coriera passa vigni 10 menüć sön chëstes trates. La linia express 112, che passa tratan l'edema vigni mesora, coliëia Balsan cun Leifers te na manira direta y asvelta.
Val d'Isarch
Tratan les domënies y ti dis de festa gnaràl aumentè i iadi dles corieres dla linia Linia 312 Porsenù - St. Andrä - Plose. Tratan l'iste sarà la linia Porsenù-Funes (340) curida vigni mesora, inće tratan les domënies y ti dis de festa. Implü gnaràl ativé n orar aposta ma por la linia 338 da Tlüses a Gufidaun, chësta linia ê ćina sëgn integrada tla linia 340.
Val de Puster
Les corieres dla linia 431 Antholz-Valdaura-Bornech fajarà n iade suplementar da Rasen ćina la staziun dla ferata de Valdaura da doman. Sön domanda dl comun de Valdaura gnarà la linia 435 dl organisada danü y ampliada cun n iade implü da doman. La trata dl Citybus Türesc 455 vëgn ampliada ćina Mühlen.
rc
