Atualità
Ejams finai dles scores ladines: Indoman la pröma proa
USP – Indöt 272 mituns y mitans à metü man en sabeda, ai 14 de jügn i ejams finai dla scora mesana. Tles cater scores altes te Gherdëna y tla Val Badia él indöt 82 scolars che fajarà en jöbia, ai 18 de jügn la pröma proa scrita di ejams de maturité.
Al é 33 scolars che é scrić ite por la pröma proa scrita di ejams de maturité tles scores altes a La Ila, 39 é scrić ite tl Istitut Tecnich Economich Raetia y 10 tla Scora d’Ert Cademia, trames döes a Urtijëi. “A desfarënzia di ejams de maturité dles scores altes todësces y talianes él i studënć dles scores ladines che po chirì fora te ći lingaz, talian o todësch, che ai ô scrì la pröma proa”, spliga l’intendënt por les scores ladines Roland Verra. L’ater lingaz gnarà spo ejaminé cun la terza proa scrita, insciö Verra.
Por ći che reverda les scores mesanes à les proes bele metü man en sabeda, ai 14 de jügn. Indöt él 272 scolars scrić ite ales proes, partis sö insciö: 59 scolars a Sëlva, 83 a Urtijëi, 61 a La Ila, 34 a San Martin y 35 a Al Plan.
A düć i scolars tan bëgn dles scores altes co inće dles scores mesanes ti aôda l’assessur por la scora ladina Florian Mussner y l’intendënt Roland Verra döt le bun por i ejams.
rc
