Atualità
Dala Junta: Partezipaziun al finanziamënt dl zënter de documentaziun
Na dezijiun tuta incö, mertesc ai 17 de jügn, tratan la sentada dla Junta provinziala é stada l’aprovaziun dla partezipaziun al finanziamënt da pert dla provinzia ales spëises por la gestiun dl zënter de documentaziun sot le monumënt dla Vittoria a Balsan.
Insciö contribuesc la provinzia de Balsan al 50 porcënt di cosć de manutenziun dl zënter de documentaziun, i atri 50 porcënt ti speta al comun de Balsan. “Cun chësta dezijiun orunse desmostrè nosta partezipaziun ala creaziun dl zënter, inće deache chësta opera de documentaziun é importanta por le mantignimënt dla conoscënza dla storia di ultimi cënt agn tl Südtirol”, spliga i assessurs Christian Tommasini y Philipp Achammer che dij inće, che “la daurida é preodüda tles proscimes edemes”. Tres por ći che reverda la spligaziun dles operes dl rejim dl fascism él preodü che le grup de laûr che é gnü inćiarié da presentè na spligaziun storica y artistica dl relief de Mussolini sön le ćiaval dlungia la plaza dl tribunal a Balsan, portarà dant süa soluziun finala tratan la daurida dl zënter de documentaziun. Implü él preodü en recordanza dl centenar dl scomenciamënt dla pröma vëra mondiala tl 1914 y dl aniversar di 75 agn dles opziuns de plü proieć y scomenciadies culturales tratan l’ann. “I orun inće inserì chëstes tematiches tla educaziun scolastica por le proscimo ann tles scores te döt le Südtirol, deache la conoscënza dla storia é la fondamënta por la convivënza pazifica”, insciö Achammer.
rc
