Atualità
Le consëi d’aministraziun nü dl Safety Park incunta l’assessur Mussner
Da püch él gnü tignì n’incuntada danter le consëi d’aministraziun nü dl Safety Park, l’assessur por la mobilitè Florian Mussner y le diretur dl departimënt Valentino Pagani. „Adöm cun le consëi d’aministraziun unse anuzé chësta incuntada por programè les proscimes ativitês y dezijiuns por ći che reverda l’aministraziun dl Safety Park”, insciö Mussner.
„La priorité dl Safety Park é l’educaziun di ciafêrs sön strada”: chësc à dit l’assessur por la mobilité Florian Mussner da püch tratan l'incuntada cun le consëi d’aministraziun nü a Balsan. Le Safety Parch é da odëi te n conzet plü general che reverda la segurëza sön strada tl Südtirol, insciö Mussner. Sön chësc é inće le presidënt dl Safety Park, Christof Brandt a öna: “Le sorvisc primar dl Safety Park é l’oferta de cursc por le rovëne sigü sön strada, oferta che podess inće gnì ampliada por ejëmpl ales ativitês de sensibilisaziun sön strada.”
Tratan l’incuntada él inće gnü debatü de d’atri temesc, sciöche por ejëmpl dl anuzamënt dla strotöra por ativitês dl tëmp lëde y dles retlamaziuns di residënć che vir dlungia la strotöra. Sce al ess da gnì organisé tl dagnì ativitês dl tëmp lëde, spo ma tl respet de regoles rigoroses por la proteziun cuntra la vera acustica. Implü ê düć i partezipanć a öna che “àl ne sarà nia preodü spëises publiches por ativitês dl tëmp lëde tl Safety Park.”
Tratan la planificaziun di proscimi vari por la regolamentaziun dles ativitês tl Safety Park gnaràl chirì la colaboraziun cun le comun de Pfatten, dandadöt por ći che reverda la proteziun cuntra la vera acustica, assigurëia l’assessur Mussner. Important él che trames les perts mostres respet por les ghiranzes tan bëgn dl comun co inće dl consëi de aministraziun dl Safety Park, à stlüt jö le presidënt Brandt.
rc
