Atualità
Dala Junta: Arat positif sön i investimënć por l’ambiënt
Dal 2011 inant mëss le conzescionar de 10 implanć idroeletrics tl Südtirol, l’aziënda SE Hydropower Srl, ti paié ai Comuns y ala Provinzia contribuć por le ressanamënt dl ambiënt. “Por i proscimi trëi agn, ćina le 2016, ciafarà i Comuns interessà y la Provinzia indöt 32,7 miliuns de euro da investì por le mioramënt y ressanamënt dl ambiënt”, spliga l’assessur por l’energia Richard Theiner.
La Junta provinziala à aprovè incö (01.07) le plann trienal ćina le 2016: insciö gnaràl finanzié mosöres por la sconanza dl ambiënt, por le sparagn energetich y le ressanamënt dla contrada di comuns olache i implanć é gnüs fać sö. Sön la basa dles tratatives danter la Provinzia, i Comuns interessà, le conzescionar SE Hydropower Srl y i comitês di implanć idroeletrics, él gnü elaborè propostes desvalies por i investimënć dl secundo plann trienal, che é gnüdes aprovades incö (01.07) dala junta. Sciöche al é gnü splighé dal assessur Theiner “él desponibl n fonds de 32,7 miliuns de euro da pert di implanć SE Hydropower, de chisc nen jarà 21,8 miliuns ai Comuns interessà y 10,9 miliuns ala Provinzia. Preodü él cun chësc finanziamënt la realisaziun de 286 mosöres de mioramënt y ressanamënt dl ambiënt y dla contrada.”
L’assessur Theiner à inće recordè che les mosöres preodüdes dala Provinzia vëgn fates por miorè la cualité dl’ega y dl ambiënt (por ejëmpl por mëte a post i biotops y les zones cun n’umidité dl terac alta y por le ressanamënt ambiental) y che indere les mosöres di Comuns é preodüdes por miorè le sparagn energetich y le smendrimënt dl incuinamënt (por ejëmpl tres l’adoranza de löms LED por l‘ilominaziun publica o le ressanamënt dl canal dles eghes de desćiaria).
Indöt saràl 400 miliuns de euro che gnarà metüs a desposiziun da pert dl conzescionar di implanć idroelectrics por le ressanamënt dl teritore y por le svilup dl’economia locala ćina le 2040. I usufruënć de chisc investimënć sarà dantaldöt i Comuns ( cun 242 miliuns de euro), olache i implanć idroelectrics anüza l’ega publica, y la Provinzia (cun 121 miliuns de euro; tres ćina le 2040). Implü él preodü le finanziamënt de mosöres spezifiches por miorè la gestiun di implanć (13 miliuns al ann él preodü por proieć por le bëgn publich porvia dles conseguënzes di implanć sön l’ambiënt y la contrada). “Insciö vëgnel finanzié mosöres importantes por l’ambiënt, por la contrada y por le sparagn energetich. Implü é chisc investimënć inće n impuls por l’economia locala y por la creaziun de posć de laûr”, à sotrissé l’assessur por l’energia Richard Theiner.
rc
