Atualità
180 gesturs dl “Roter Hahn” fej vijita ai urć de Ćiastel Trauttmansdorff
Cun l’incuntada al 1. de messè ti urć de Ćiastel Trauttmansdorff é rové le “Dé di paurs“ chësc ann bele ala sesta ediziun. Fat para à indöt 180 titolars dles aziëndes da paur “Roter Hahn” che à insciö podü dé n’odlada da plü daimprò al'ativité turistica tratan la sajiun da d’isté a Maran.
Organisé vëgn la vijita vigni ann dal Südtiroler Bauernbund. Chësta vijita é inće n’ocajiun por sotrissé la buna colaboraziun danter la direziun di urć de Ćiastel Trauttmansdorff y l’organisaziun di paurs tl Südtirol. Tratan le “Dé di paurs” él insciö düć i gesturs dles aziëndes da paur “Roter Hahn” gnüs invià a tó pert a na vijita cun n acompagnadù ai urć y al museum sön la storia dl turism a Maran.
Le diretur di urć, Daniel Bedin, à dit da ester contënt dla gran partezipaziun: “La colaboraziun cun l’organisaziun di paurs tl Südtirol à portè a n gran suzès y renforza tramesdöes les perts. Al se fej tres plajëi da podëi s’incuntè y da colaboré cun les aziëndes che ofrësc vacanzes sön le lüch da paur.”
Inće Hans-Josef Kienzl, responsabl por le marketing dl „Roter Hahn“ y Bernhard Burger à recordè la buna colaboraziun: “Chësta vijita é por düć i titolars dles aziëndes tres na buna ocajiun por podëi imparè a conësce plü daimprò i urć de Ćiastel Trauttmansdorff sciöche atraziun turistica”.
rc
Galaria dales fotografies
