Atualità
Sessiun da d’altonn por l’ejam da iagher: Iscriziuns ćina ai 29 de agost
I proscimi ejams por deventè iagri gnarà tignis a San Laurënz dai 14 ćina ai 17 de otober y a Maran-Obermais dai 21 ćina ai 24 de otober. Les domandes por l’iscriziun mëss gnì dades jö cun n formular cun n martl da bol da 16 euro y cun le numer de telefonn ćina al plü tert ai 29 de agost al Ofize Ćiacia y Pëscia tl palaz provinzial 6, strada Brenner 6, a Balsan.
Le formular d’iscriziun ciàfon diretamënter tl Ofize Ćiacia y pëscia o sön internet sön la plata: www.provinz.bz.it/forst/3204/
Al vëgn comuniché che la proa de teoria po inće gnì dada jö a San Laurënz. I candidać vëgn insciö perià da dè dant le post olache ai ô dè jö la proa. Por la proa da stlopetè val debojëgn inće de n zertificat dl dotur, adöm cun le formular d’iscriziun cun n martl da bol de 16 euro. L’atestaziun à na dorada dla validité de sis mëisc.Implü vëgnel lascè alsavëi, che cun la mudaziun dla lege di 8 de messè dl 1998, nr. 230 (art. 15, coma 7) sön la obieziun al sorvisc militar por rajiuns de cosciënza, po se scrì ite al ejam inće les porsones che à refodè le sorvisc sce ai renunziëia a so status de “obieturs al sorvisc militar”. La detlaraziun de renunzia mëss gnì scrita fora y dada jö al “Ufficio Nazionale per il Servizio Civile” a Roma. I formulars dla detlaraziun pon ciafè sön internet. L’azetaziun dla renunzia dl ofize competënt de Roma mëss gnì injuntada ala domanda d’iscriziun.
Al ejam po se scrì ite dötes les porsones che à complì i 18 agn. L’ejam é partì sö te n test de teoria y te n test da stlopetè. Tratan la pert teorica vëgnel ejaminé les conescënzes sön la vegetaziun salvaria, la lege sön i iagri, les ermes, la sconanza dla natöra, i ćians da ćiacia y les tradiziuns di iagri.
Al vëgn informè che dan l’ejam da stlopetè gnaràl fat n ejam a usc cört sön l’adoranza dles ermes da ćiacia.
A San Laurënz él la stlopetara desponibla dal 1. de setëmber , vigni lönesc y mercui dales 18 ales 22 (tel. 0474 474278), a Obermais dai 4 de otober vigni sabeda y domënia dales 9 ales 12 y dales 15 ales 18, sciöche inće vigni mertesc, jöbia y vëndres dales 15 ales 18 (tel. 0473 237466)
Düć i candidać ciafarà na comunicaziun scrita sön ći dè y ći ora che ai messarà se presentè al ejam. Por de plü informaziuns pon tó sö contat cun l’Ofize Ćiacia y pëscia al numer 0471 415175.
rc
