Atualità
L’assessuria Stocker vijitëia la sënta dla Caritas a Balsan
L’assessuria provinziala Martha Stocker s’à incuntè da püch cun i direturs dla Caritas tla sënta a Balsan por s’informè sön l’ativité dl’assoziaziun.
I direturs dla Caritas, Heiner Schweigkofler y Paolo Valente, ti à portè dant da püch al’assessuria por la sanité y les politiches soziales Martha Stocker tratan na vijita tla sënta dla Caritas a Balsan les ativitês plü importantes che vëgn organisades dal’assoziaziun. La Caritas organisëia por ejëmpl inće les vacanzes al mer por zirca 3000 jogn.
Atualmënter organisëia la Caritas tl Südtirol 30 sorvisc por porsones en dificolté. Öna dles sfidades plü granes dl'assoziaziun é por le momënt l'assiguraziun dl finanziamënt dles ativitês, deache al é gnü registré, por gaujia dla crisa economica, n smendrimënt dles donaziuns privates y tl medemo momënt inće na reduziun dl sostëgn finanziar publich. Le bilanz complessif dla Caritas é de zirca 16 miliuns de euro al ann, 15 porcënt vëgn curì atualmënter da n contribut publich. L’assessuria Stocker à rengrazié tratan l'incuntada dötes les porsones che laôra y mët a desposiziun so tëmp por la Caritas, inće deache al é n'istituziun che dëida y sostëgn les perts plü debles dla sozieté.
rc
